amérika we engliye ayropilanliri hudeydeni bombardiman qildi

türkiye awazi radiyosi xewiri: xusiylarning «elmesire» téléwiziyesi amérika we engliye ayropilanlirining hudeyde shehirige qarashliq essalif nahiyesidiki ras isa rayonini beshinchi qétim bombardiman qilghanliqini xewer qildi.

amérika we engliye ayropilanlirining seherde hudeydeni alte qétim bombardiman qilghanliqi uqturulghan idi.

hudeyde shehirining déngiz qirghiqi uzun bolup, hayatiy ehmiyetke ige üch porti barliqi sewebidin yemenning eng muhim sheherliridin biri hésablinidu.

amérika merkiziy qomandanliq ishtabining etigenki bayanatigha asaslanghanda, 19-féwral (2024) xusiylarning eden portigha qarap ilgirilewatqan amérikaning «M/V Sea Champion» yük paraxotigha bashqurulidighan bomba atqan.

yemende iranning qollishi astidiki husiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.

amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.

nurghun xelqaraliq déngiz tiransport shirketliri xusiylarning hujumliri sewebidin qizil déngizdiki paraxot qatnishini bikar qildi.

dunya sodisining texminen %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.