amérika we engliye urush ayropilanliri hudeydeni bombardiman qildi
yemendiki iran qollawatqan husiylar, amérika we engliye urush ayropilarnlirining yemenning gherbidiki hudeyde wilayitining nurghun jaylirini bombardiman qilghanliqini bildürdi.
türkiye awazi radiyosi xewiri: husiylarning «elmesire» qanili, amérika bilen engliyening yemenning gherbidiki hudeyde wilayitining jenubigha jaylashqan tuheyte shehirining oxshimighan jaylirini bombardiman qilghanliqini xewer qildi؛ xewerde, hujumning adem ölüsh yaki yarilinish ehwalini keltürüp chiqarghan-chiqarmighanliqi heqqide melumat bérilmidi, amérika bilen engliyemu mezkur hujum toghrisida héchqandaq bayanat élan qilmidi.
husiylarning herbiy bayanatchisi yehya seri tünügün amérikaning qizil déngizdiki «yultuz iris» namliq paraxotigha zerbe bergenliklirini élan qilghanidi.
yemende iranning qollishi astidiki husiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.
amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.
nurghun xelqaraliq déngiz tiransport shirketliri husiylarning hujumliri sewebidin qizil déngizdiki paraxot qatnishini bikar qildi.
dunya sodisining texmine %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.
