amérika bilen xusiylar bir-birige qarshi bayanatlarni élan qildi

türkiye awazi radiyosi xewiri: amérika merkiziy armiye qomandanliq ishtabi-séntkom bayanat élan qilip, xusiylarning qoyup bérilish aldidiki bir dane quruqluqtin hawagha étilidighan bashqurulidighan bombisining bitchit qilinghanliqini bildürdi.

xusiylarning herbiy bayanatchisi yehya seri éks (X) adrésida uchur hemberlep, isirailiyege qarap ilgirilewatqan amérikaning bir soda paraxotigha bashqurulidighan bomba atqanliqlirini bildürdi.

u amérika we engliyening hujumlirigha jawab qayturushta ikkilenmeydighanliqlirini eskertip, qizil déngizdin ötken amérika bilen engliye paraxotlirining özliri üchün qanunluq hujum nishani ikenlikini tekrarlidi.

xusiylargha qarashliq «el mesira» téléwiziyesining xewiride bildürülishiche, amérika we engliye ayropilanliri yemenning gherbiy shimaligha jaylashqan sada shehirining shimalini bombardiman qilghan.

yemende iranning qollishi astidiki xusiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.

amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.

dunyadiki nurghun xelqaraliq déngiz tiransiport shirketliri xusiylarning hujumliri sewebidin qizil déngizdiki paraxot qatnishini bikar qildi.

dunya sodisining texmine %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.