bir guruppa israiliyelik insanperwerlik yardemlirining ghezzege kirishige tosqunluq qilmaqta
israiliyening hujumliri sewebidin acharchiliqqa duch kelgen ghezze rayonigha insanperwerlik yardimi élip mangghan aptomobillarning kirishige tosqunluq qilish üchün, bir guruppa israiliyelik teripidin qiliniwatqan namayish 5 -künidimu dawamlashti.
türkiye awazi radiyosi xewiri: isirailiye yerlik taratqulirining xewerlirige asaslanghanda, bir top israiliyelik uda besh kündin buyan ghezzening sherqiy jenubidiki kérem ebu salim chégra derwazisida namayish ötküzüp, b d t (birleshken döletler teshkilati) ning insanperwerlik yardimini élip kelgen yük aptomobilirining ghezzege kirishige tosqunluq qilmaqta. texminen 2 milyon 300 ming pelestinlik yashaydighan ghezze rayoni 7 - öktebir (2023) din buyan israiliyening wehshiyane hujumlirining astida turmaqta.
israiliyening qattiq bombardimani we yardem aptomobillirining rayongha kirishige tosqunluq qilish sewebidin, ghezzede yashaydighan pelestinlikler acharchiliqqa duch kelmekte.
ghezzediki acharchiliq kirizisi, eng yuqiri derijige yetken bolsimu, bir qisim israiliye puqraliri ghezzege yardemlerning yollinishighimu qarshi chiqmaqta.
israiliyening 7-öktebirdin buyan ghezze rayonigha qilghan wehshiyane hujumida kem dégende 11 ming kichik bala we 7 ming 500 ayalni qoshqanda, jemiy 26 ming 422 pelestinlik öltürüldi. 65 ming 87 pelestinlik yarilandi. xarabilik astida yene minglighan kishining jesti barliqi bildürülmekte.
pelestin xelqi panahlanghan doxturxana we maarip orunlirimu hujumgha uchrap, ammiwi ul- esliheler weyran qilinmaqta.
