yemende jiddiychilik küchiyip ketti؛ amérika bilen engliye husiylarni bombardiman qildi

türkiye awazi radiyosi xewiri: amérika bilen engliye birleshme herbiy heriket qozghap, yemendiki husiylargha tewe 30 orunni bombardiman qildi؛ arqidin amérika qisimliri öz aldigha yéngidin aldinqigha qarighanda bir qeder tar dairilik hujum qozghap, husiylarning bir radar eslihesini bitchit qilip tashlidi.

yemendiki husiylarning «elmesira» qanili, amérika bilen engliyening yemenning paytexti sanagha hujum qilghanliqini xewer qildi.

israiliye ghezzege hujum qozghighandin buyan yemendiki husiylar qizil déngizdiki soda paraxotlirigha hujum qilishni kücheytken, amérika bilen engliye husiylargha tewe orunlargha hujum qilghanidi.

husiylar israiliyening ghezzege qaratqan hujumliridin intiqam alidighanliqini ilgiri sürüp, qizil déngizdiki soda paraxotlirigha hujum qilishni bashlighandin kéyin, nurghun déngiz tiransporti shirketliri qizil déngizdiki qatnashlirini toxtitishni qarar qilghanidi.

amérika husiylarning qizil déngizdiki soda paraxotlirigha qaratqan hujumlirigha taqabil turush üchün, «xelqara déngizda wezipe ötesh qisimliri» teshkillesh pikrini otturigha qoyup, «parawanliqni qoghdash herikiti» dégen namda bir köp döletlik ittipaqdash qisim teshkilligenlikini élan qilghanidi.

husiylarning hujumliri aq déngiz bilen qizil déngizni özara tutashturup, yer shari sodisining texminen% 12 i qilinidighan yawropa bilen asiya otturisidiki eng qisqa yol — süweyish qanilidin ötüshni xewpke ittirgen, soda paraxotliri uchrighan hujumlargha egiship, munasiwetlik shirketlerning arqa-arqidin chiqarghan qatnashni toxtitish qararliri, dunya iqtisadida yéngi bir «teminlesh zenjiri kirizisi»ning bashlinip kétish endishisini peyda qilghanidi.