ياپونىيەدىكى يەر تەۋرەشتە جېنىدىن ئايرىلغانلارنىڭ سانىدا ئېشىش كۆرۈلدى

تۈركىيە ئاۋازى رادىيوسى خەۋىرى: ئىشىكاۋا ئىشتاتلىق ھۆكۈمىتى بايانات ئېلان قىلىپ، يېڭى يىلنىڭ تۇنجى كۈنلىرىدە يۈز بەرگەن يەر تەۋرەشتە جېنىدىن ئايرىلغانلار سانىنىڭ 215 كە چىققانلىقىنى بىلدۈردى.

باياناتتا، 4 مىڭ 100 دىن ئارتۇق بىنانىڭ بۇزغۇنچىلىققا ئۇچرىغانلىقى، ئوخشىمىغان 22 رايوندا 28 مىڭدىن ئارتۇق كىشىنىڭ تارقاقلاشتۇرۇلغانلىقى، ئىشتاتتا قاتنىشى توختىتىلغان يوللار سەۋەبىدىن 3 مىڭدىن ئارتۇق كىشىنىڭ يوللاردا قاپسېلىپ قالغانلىقى قەيت قىلىندى.

باياناتتا، يەر تەۋرەشتە يارىلانغان جەمئىي 567 كىشىنىڭ ھەر قايسى دوختۇرخانىلاردا داۋالىنىۋاتقانلىقى، ھازىرغىچە دېرىكى ئېلىنالمىغان 38 كىشىنىڭ ئىز-دېرىكىنى ئېلىش ئۈچۈن تىرىشچانلىقلارنىڭ كۆرسىتىلىۋاتقانلىقى قەيت قىلىندى.

ياپونىيە دۆلەت مۇداپىئە ۋەزىرى كىخارا مىنورۇ 6 مىڭ 300 ئەسكەرنىڭ رايوندا ئىزدەش-قۇتقۇزۇش خىزمەتلىرىگە قاتناشقانلىقىنى بىلدۈردى.

ياپونىيە مېتېرولوگىيە ئىدارىسى 1-2-3- 4-يانۋار كۈنلىرى ئىشىكاۋانىڭ نوتو يېرىم ئارىلى ۋە قىرغاقلىرىدا، تۆت بالدىن يەتتە بالغىچە بولغان يەر تەۋرەشلەرنىڭ يۈز بەرگەنلىكىنى ئېلان قىلغان ئىدى.