yaponiyediki yer tewreshte qaza qilghanlar sani 30 gha yetti

türkiye awazi radiyosi xewiri: yaponiye météorologiye idarisi bayanat élan qilip, tünügün noto yérim arili we gherbtiki ishikawa déngiz qirghiqida küchi 5 baldin 7 balghiche bir qanche qétim yer tewrigenlikini, ilgiri élan qilinghan déngiz tashqini agahlandurushining ishkawa déngiz qirghiqini öz ichige alghan barliq jaylarda bikar qilinghanliqini uqturdi.

igilinishiche, yer tewreshtin kéyin yuqiri süretlik tashyollarning bezi jayliri yérilip ketken, noto yérim arilining wajima shehiride yüz bergen ot apiti yéqin etraptiki 200 ge yéqin binagha ziyan yetküzgen.

yaponiye dölet téléwiziyesi — NHK, wajimadiki 7 qewetlik bir binaning yan ketken körünüshlirini tarqatti.

ishikawa waliysi, yer tewreshte 30 kishining hayatidin ayrilghanliqini élan qildi.

apet rayonliridin 50 minggha yéqin kishining tarqaqlashturulghanliqi we oxshimighan jaylarda 14 kishining xarabilik astida qutuldurulushini kütüp turuwatqanliqi éniqlandi.

apet rayonidiki 19 tébbiy orunda tok toxtap kétish ehwalining körülgenliki, talla bazarliri we milichmal dukanliridiki mehsulatlarning tügep ketkenliki qeyt qilindi.

bash wezir kishida fumiyo merkizi hökümetning paraxotlar bilen rayongha yardem matériyallirini yetküzüshke teyyarliq qiliwatqanliqini bildürüp: «waqitning ötüshige egiship, apetning tesiri téximu  gewdilenmekte. hayat qutquzush waqitqa qarshi bir musabiqe» dédi.

bu jeryanda, yaponiye jughrapiye uchur merkizi bayanat élan qilip, yer tewreshni analiz qilish arqiliq déngiz qirghiqidiki wajima quruqluqining 1.3 métir gherbke yürüshüp ketkenlikining éniqlanghanliqini otturigha qoydi.