iran, misir we iyordaniye tashqi ishlar ministirliri ghezze weziyiti toghrisida sözleshti
iran tashqi ishlar ministiri hüseyin emir abdullahiyan iyordaniye we misirliq mensepdashliri bilen téléfonliship, israiliyening ghezzediki hujumliri we rayondiki kirizisni muzakire qildi.
türkiye awazi radiyosi xewiri: iyordaniye tashqi ishlar ministirliqi yazma bayanat élan qilip, abdullahiyan bilen iyordaniyelik mensepdishi eymen sefedining téléfonliship, israiliyening ghezzege qaratqan hujumlirini toxtitish we insanperwerlik yardemlerni yetküzüp bérish yolidiki tirishchanliqlarni muzakire qilghanliqini uqturdi.
bayanatta körsitilishiche, abdullahiyan iyordaniye we padishah abdullah ikkinchining pelestin mesilisini qollash yolidiki tirishchanliqigha yuqiri baha bergen.
téléfon söhbiti jeryanida, süriye arqiliq iyordaniyege qiliniwatqan zeherlik chékimlik etkeschiliki we uning élip kélidighan xewpi qatarliqlarmu muhakime qilinghan.
sefedi iyordaniyening zeherlik chékimlik etkeschilikini dölet bixeterlikige tehdit dep qaraydighanliqini we barliq tedbirlerni qollinip uni yoqitidighanliqini otturigha qoyghan.
abdullahiyan yene, misirliq mensepdishi semih shukri bilen téléfon söhbiti ötküzdi؛ misir tashqi ishlar ministirliqi féysbuktiki adrésida bayanat élan qilip, abdullahiyan bilen shukrining téléfonliship, ghezzediki insanperwerlik kirizisi we uni peseytish üchün xelqarada ishliniwatqan xizmetler, shundaqla ikki dölet mesililirini muzakire qilghanliqini uqturdi.
bayanatta körsitilishiche, shukri söhbet jeryanida, abdullahiyangha misirning ghezzede urush toxtitish we insanperwerlik yardimi éqimigha kapaletlik qilish yolidiki tirishchanliqlirining netijisi heqqide uchur bergen.
