hindi okyanda bir paraxot hujumgha uchridi

türkiye awazi radiyosi xewiri: amérika dölet mudapie ministirliqi hindi okyanda hindistangha qarap ilgirilewatqan bir ximiyelik madda toshughuchi paraxotning hujumgha uchrighanliqi toghrisida bayanat élan qildi.

bayanatta, «yaponiyening gollandiye teripidin ijare élinghan < Chem Pluto> namliq ximiyelik madda toshughuchi paraxoti, bügün (tünügün) shu yer waqti 10.00 (enqere waqti 18.00) da hindi okyan qirghiqidin 370 kilométir yiraqliqta hujumgha uchridi» déyildi.

bayanatta, hujumning irandin qoyup bérilgen taq yölinishlik uchqu bilen qilinghanliqi we héchqandaq ölüm-yétim hadisisining körülmigenliki, paraxotta chiqqan otning öchürüwélinghanliqi qeyt qilindi.

hujum yüz bergende amérika herbiy paraxotining yéqin etrapta emesliki, amérika déngiz armiye merkiziy qomandanliq ishtabining hindistangha qarap ilgirilewatqan paraxot bilen alaqisini saqlap qalghanliqi eskertildi.

bayanatta mundaq déyildi:

«bu iranning 2021-yildin buyan soda paraxotlirigha qilghan yettinchi hujumidur.»

biraq, iran hazirghiche hujumgha munasiwetlik héchqandaq bayanat élan qilmidi.

déngiz bixeterlik shirkiti ambréy (Ambrey) b b s ning ziyaritini qobul qilip, mezkur paraxotning seudi erebistandin hindistangha qarap yolgha chiqqanliqi we isirailiye bilen munasiwiti barliqi toghrisida melumat berdi.

yemende iranning qollishi astidiki husiylar ghezzede 7-öktebirdin buyan hujumlirini dawamlashturuwatqan isirailiyege naraziliqini bildürüp, qizil déngizda isirailiye paraxotlirini hujum nishani qilidighanliqi toghrisida tehdit salghan idi.

husiylar heriket qilishni bashlighandin kéyin, nurghun paraxot shirketliri qizil déngizda seper qilishni toxtatqan idi.

hamasning herbiy qaniti qassam birigadiliri 7 - öktebir (2023) de israiliyege qarshi «eqsa topani» namliq keng kölemlik hujum qozghighanliqini élan qilghan we buninggha qarita israiliye qisimliri urush ayropilanliri bilen ghezze rayonini wehshilerche bombardiman qilip, «tömür qilich herikiti» ni bashlighanliqini jakarlighan idi.