sulliwan israiliyede ziyarette bolidu
amérika qoshma ishtatliri dölet xewpsizlik ishliri meslihetchisi jék sulliwan israiliyening hujumliri dawamlishiwatqan ghezze rayonining weziyiti we rayondiki özgirishler heqqide muzakire élip bérish üchün israiliyede ziyarette bolidu.
türkiye awazi radiyosi xewiri: aqsaray teripidin élan qilinghan bayanatta körsitilishiche, amérika qoshma ishtatliri dölet xewpsizlik ishliri meslihetchisi jék sulliwan 14 – 15 – dékabir künliri israiliyede ziyarette bolidiken, hemde ziyariti dairiside israiliye pirézidénti ishaq hérzog we israiliye bash ministiri bényamin nétanyahu bilen körüshidiken.
israiliyening ghezze rayonida dawamlashturuwatqan hujumliri tüpeyli puqralarning ölüsh-yarilinish weqeliri köpiyiwatqan we insaniy tiragédiye barghanséri éghirlishiwatqan bir peytte israiliyege qilidighan ziyariti dawamida, sulliwanning baydin hökümitining bu mesililerge qarita pozitsiyesini yene bir qétim israiliye terepke yetküzüshi kütülmekte iken.
amérika qoshma ishtatliri pirézidénti jo baydin tünügün (13-dékabir) élan qilghan bayanatida, israiliyening ghezze rayonini «qalaymiqan bombardiman qilishi» sewebidin dunyaning qollishini yoqitip qoyushqa bashlighanliqini we israiliye bash ministiri bényamin nétanyahuning kirizisqa uzun muddetlik hel qilish charisi tépish üchün hökümitini qaytidin özgertip teshkil qilishi kéreklikini éytqanidi.
