sanchéz yawropa döletlirini pelestin-israiliye mesilisini ochuq-ashkara otturigha qoyushqa chaqirdi
ispaniye bash ministiri pédro sanchéz yawropa ittipaqining 7-öktebirdin buyan ghezzege hujum qilishni dawamlashturuwatqan israiliyege «kupaye» déyishini telep qildi.
türkiye awazi radiyosi xewiri: ispaniye bash ministiri pédro sanchéz ispaniyening dékabir éyining axirida yawropa ittipaqining nöwetchi reisiliki wezipisini tamamlaydighanliqi munasiwiti bilen yawropa parlaménti omumiy kéngishide söz qildi.
sanchéz yawropa parlamént ezalirigha xitaben «israiliye we pelestinde yüz bériwatqan ishlar heqqide ochuq paranglishidighan peyt keldi. süküt qilishni tashlap, israiliye we pelestinde yüz bériwatqan ishlar toghrisida éniq shundaqla birdeklik ichide sözlenglar... dunyaning bizni mewqeside ching turidighan bir siyasiy - jughrapiyelik küch dep qarap, hörmet qilishini kütidighan bolsaq, puqralirimizning heriketlirimizdin pexirlinishini we yawropa qimmet qarishining peqet söz – ibarilerdinla ibaret emeslikini körüp yétishini xalisaq, choqum yuqiri awazda, éniq we birdek ipade bildürüshimiz kérek» dédi.
hamasning 7 – öktebirdiki hujumlirini eyibleydighanliqini we esirlerning qoyup bérilishini kéreklikini yene bir qétim tekitligen sanchéz, sözini dawamlashturup: «biz choqum ottura sherq miqyasida térrorluqqa qarshi turush kürishini qollishimiz kérek. biz israiliyening özini qoghdash we mewjutluq hoquqini étirap qilishimiz kérek, emma oxshash étiqad we oxshash qimmet qarash bilen, ghezzediki minglarche sebiyni öz ichige alghan bigunah puqralarning ölümi üchünmu <kupaye> déyishimiz kérek. bombardimanlar derhal toxtishi, insanperwerlik yardemliri choqum jiddiy we yéterlik miqdarda yetküzüp bérilishi lazim» dégenlerni qeyt qildi.
yawropaning israiliye – pelestin mesilisige keskin we keng dairilik chare tépish tirishchanliqlirigha aktip töhpe qoshushi, bu dairide xelqara qanun we xelqara insanperwerlik qanunigha emel qilinishini telep qilishi kéreklikini otturigha qoyghan sanchéz: «ishenchlik, estayidil tinchliq qarishining otturigha qoyulushigha kapaletlik qilish, israiliye döliti bilen birlikte tinchliq we bixeterlik ichide mewjut bolup turidighan bir pelestin dölitini étirap qilish musapisini bésip ötidu» dégenlerni sözlirige ilawe qildi.
