ispaniye bashchiliqida töt bash ministir charléz mishélgha ghezze heqqide birleshme mektup yollidi

türkiye awazi radiyosi xewiri: ispaniye, bélgiye, irélandiye we malta bash ministirliri yawropa ittipaqi kéngishi reisi charléz mishélgha mektup yollap, yawropa kéngishi bashliqlar yighinida israiliyening bombardimanchiliqi astidiki ghezzening weziyitige qarita éniq pozitsiye bildürüshni telep qildi.

ispaniye bash ministirliqi menbelirining bayanatigha asaslanghanda, bash ministir pédro sanchéz, bélgiye bash ministiri aléksandér dé kro, irélandiye bash ministiri léo waradkar we malta bash ministiri robért abéla yawropa ittipaqi kéngishining reisi mishélgha birleshme mektup yollighan.

mektupta, 14 – dékabirdin 15 - dékabirghiche biryussélda ötküzülidighan yawropa ittipaqi kéngishi bashliqlar yighinida, ghezze weziyiti we ikki döletlik hel qilish charisi heqqide éniq pozitsiye bildürüshke alaqidar muzakirelerning  küntertipke kirgüzülüshi telep qilindi.

töt bash ministir israiliyening hamasning 7 - öktebirdiki térrorluq hujumini eyiblep, xelqara qanungha mas halda özini qoghdisa bolidighanliqini qayta tekitlidi hemde yene, uzun muddetlik urush toxtitish, ghezzediki puqralarni qoghdash we insanperwerlik yardemlerning tosalghusiz yetküzülüshige kapaletlik qilish üchün yawropa ittipaqining ortaq qarar chiqirishi kéreklikini otturigha qoydi.

hamasning herbiy qaniti qassam birigadiliri 7- öktebirde israiliyege qarshi «eqsa topani» namliq keng kölemlik hujum qozghighanliqini élan qilghan, buninggha qarita israiliye qisimliri urush ayropilanliri bilen ghezze rayonini bombardiman qilip, «tömür qilich herikiti»ni bashlighanliqini jakarlighan idi.

künséri keskinlishiwatqan toqunushlarda, köpinchisi kichik balilar bolup, 17 mingdin artuq pelestinlik jénidin ayrildi.