xelqara jemiyet amérikagha qattiq naraziliq bildürdi
birleshken döletler teshkilati xewpsizlik kéngishide ghezzede «insanperwerlik nuqtisidin derhal urush toxtitish» telep qilinghan qarar layihesi amérika qoshma ishtatliri teripidin wéto qilindi.
türkiye awazi radiyosi xewiri: birleshken döletler teshkilati xewpsizlik kéngishining 15 ezasidin 13 i qollap awaz bergen qarar layihesining amérika qoshma ishtatliri teripidin wéto qilinishigha xelqara jemiyet qattiq naraziliq bildürdi.
shiwéytsariye bilen slowéniye qarar layihesining wéto qilinishidin qattiq epsuslinidighanliqlirini bildürdi.
maltaning birleshken döletler teshkilatida turushluq daimiy wakaletxanisining ammiwi ortaqlishish tor bétidiki sehipiside, bu heqte élan qilinghan bayanatida, mundaq déyildi:
«ghezzening weziyitini héchkim yaxshi déyelmeydu, derweqe, ghezzede balayiapet yüz bermekte. shunga, derhal urush toxtitishqa kapaletlik qilinishi kérek.»
xelqaraliq ammiwi teshkilatlar «balilarni qutquzuwélinglar» témisida élan qilghan bayanatida, engliyening qarar layihesini qollimay, awaz bérish hoquqidin waz kéchishini tenqid qildi.
ammiwi teshkilatlarning ammiwi ortaqlishish tor bétidiki sehipiside, bu heqte élan qilinghan bayanatida, mundaq déyildi:
«qarar layihesini qollimay az bérish hoquqidin waz kechkenliki üchün, engliyemu ghezzediki balilarni qirghin qilghuchilarning shérikidur.»
«engliye bash weziri rishi sunak we hökümiti yene bir qétim ghezzediki balilardin yüz öridi.»
pelestinning birleshken döletler teshkilatida turushluq daimiy wekili riyad mensur, qarar layihesining ret qilinishi heqqide qilghan sözide, mundaq dédi:
«bu, xewpsizlik kéngishi üchün qorqunchluq bir kün, buni ret qilimiz, biz bu zulumni toxtitish üchün barliq qanunluq wasitilerni qollinishni dawamlashturimiz.»
hamasning herbiy qaniti bolghan qessam birigadiliri 7-öktebir shenbe küni etigende, israiliyening «pelestinliklerni we mesjidi eqsani öz ichige alghan muqeddes jaylirini dawamliq depsende qilish qilmishlirigha jawab qayturush» meqsitide, israiliyege qarshi «eqsa topani» namliq keng kölemlik hujum qozghighanliqlirini élan qilghanidi.
igilinishiche, israiliyening ghezze rayonda dawamlashturuwatqan hujumlirida kem dégende dégende 7 ming 112 bala we 4 ming 885 ayalni öz ichige alghan 17 ming 487 pelestinlik qaza qilghan, minglarche kishining jesetliri xarabilik astida qalghan.
