yawropa ittipaqi: israiliye ghezzede irqiy qirghinchiliq yürgüzüwatidu
yawropa ittipaqi tashqi munasiwetler we bixeterlik siyasiti aliy wekili josép borrél israiliyening ghezzede dawamlashturuwatqan hujumlirini «irqiy qirghinchiliq» dep atap, ölüp ketken pelestinlikler sanining élan qilinghinidinmu köp ikenlikini éytti.
türkiye awazi radiyosi xewiri: josép borrél bélgiyening paytexti biryussélda ötküzülgen 25-nöwetlik kishilik hoquq munbiri yighinida qilghan sözide, ghezzening weziyiti heqqide toxtilip mundaq dédi:
«gerche israiliyening özini qoghdash hoquqi bolsimu, emma héchkim bunche köp puqralarning ölüp kétishini qobul qilalmaydu.»
«10-ayning 7-küni hamasning israiliyege qilghan hujumi irqiy qirghinchiliq, israiliyening ghezzede dawamlashturuwatqan hujumlirimu oxshashla irqiy qirghinchiliq hésablinidu. bir dehshet yene birini aqliyalmaydu.»
«israiliyening hujumliri dawamida zadi qanchilik ademning ölüp ketkenlikini héchkim bilmeydu. hujumlarda 15 ming kishining ölüp ketkenliki xewer qilinmaqta, emma xarabiliklerning astida yene nurghun kishiler bolushi mumkin. shuni alahide tekitlep ötimenki, xelqara jemiyet rayonda yüz bériwatqan dehshetke qarshi téximu köp naraziliq bildürüshke we bu dehshetke xatime bérilishini telep qilishqa bashlidi. yehudiylargha düshmenlik qilmay turup israiliyeni tenqidlesh mumkin bolushi kérek. men israiliye dölitining mewjutluqigha qarshi chiqmay turup, ikki döletlik hel qilish tüzümini qoghdash hoquqigha ige bolush terepdarimen.»
u yene, iyordan deryasining gherbiy qirghiqidiki qanunsiz yehudiy köchmenlerni orunlashturush heriketliri we pelestinliklerge qaritilghan zorawanliqlargha xatime bérilishi kéreklikinimu sözlirige ilawe qildi.
hamasning herbiy qaniti bolghan qessam birigadiliri 7-öktebir shenbe küni israiliyege qarshi «eqsa topani» namliq keng kölemlik hujum qozghighanliqlirini élan qilghanidi.
israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürgenidi.
igilinishiche, israiliyening barghanséri keskinlishiwatqan hujumliri dawamida, köpinchisi balilar bolup, 16 minggha yéqin pelestinlik jénidin ayrilghan.
