hérzi halewi 7 - öktebirde israiliye armiyesining meghlup bolghanliqini qayta tekitlidi

türkiye awazi radyosi xewiri: isiraliye armiye bash ishtabi bashliqi hérzi halewi axbarat élan qilish yighinida küntertiptiki mesililer üstide toxtaldi.

halewi israiliye armiyesining muhasire astidiki ghezze rayonigha qarshi yéngi hujumlarni qilishqa teyyar ikenlikini bildürüp, «insanperwerlik nuqtisidin waqitliq urush toxtitish» kélishimidin herbiy teyyarliqlarni közdin kechürüwélish üchün paydilanghanliqlirini éytti.

halewi israiliye armiyesining ghezzediki barliq tutqunlar qoyup bérilmigiche urushni toxtimaydighanliqini tekitlidi.

halewi israiliye armiyesining hamasning herbiy qaniti izeddin qassam birigadilirining 7 - öktebirdiki hujum pilani toghrisida axbaratqa ige ikenlikini, biraq yuqiri derijilik ofitsérlarning qol astidikilerning agahlandurushlirigha asasen dégüdek  pésent qilmighanliqigha dair xewerler üstidimu toxtilip, ghezzege qilinghan hujumlar axirilashqandin kéyin hemme ishning tekshürülidighanliqini éytti.

halewi herbiy istixbarat bashqarmisi qatarliq pütkül israiliye armiyesining 7 – öktebirde meghlup bolghanliqini qayta tekitlep, bu toghriliq jiddiy tekshürüshlerning élip bérilidighanliqini, emma hazirche ghezzege qaritilghan hujumlargha merkezlishish kéreklikini bildürdi.

hamasning herbiy qaniti qassam birigadiliri 7 - öktebirde israiliyege qarshi «eqsa topani» namliq keng kölemlik hujum bashlighan we israiliye qisimlirimu buninggha qarita urush ayropilanliri bilen ghezze rayonigha qarshi «tömür qilich herikiti» ni bashlighanliqini élan qilghan idi.

künséri keskinlishiwatqan toqunushlarda,  köpinchisi kichik balilar bolup, jemiy 15 mingdin artuq pelestinlik öltürülgen idi.