gollandiyediki saylamda türk qizining rehberlikidiki partiye üchinchi boldi
gollandiyede ötküzülgen saylamlarda, jezmleshmigen netijilerge asaslanghanda, gért wildérs rehberlikidiki radikal ongchi erkinlik partiyesi (PVV) chong perq bilen birinchi orungha ötti.
türkiye awazi radiyosi xewiri: gollandiyede tünügün (22-noyabir) kechte enqere waqti 23.00 te axirlashqan awaz tashlashta, deslepki netijilerge asaslanghanda, radikal ongchi erkinlik partiyesi 150 kishilik parlaméntta 35 orunni qolgha keltürüp birinchi rette turghan. yawropa ittipaqi komitétining muawin bashliqi frans timmérmens rehberlikide saylamgha ittipaq bilen qatnashqan shichi partiyesi (PvdA) we yéshil sol (Groen Links) partiyesi 25 orunni qolgha keltürüp ikkinchi rette turghan.
ilgiriki saylamgha sélishturulghanda, parlaméntta 10 orunni qoldin chiqirip qoyghan dilan yéshilgöz-zégériyus rehberlikidiki erkinlik we démokratiye üchün xelq partiyesi (VVD) 24 orunni qolgha keltürüp üchinchi rette turghan.
ezalirining köpinchisi türk we bashqa musulmanlar bolghan denk partiyesining parlamént ezaliri sani üch boldi. ilgiriki saylamlargha sélishturulghanda héchqandaq özgirish bolmidi.
gollandiye qanuni boyiche, bir partiyening öz aldigha hökümet teshkilliyelishi üchün parlaméntta 76 orungha ige bolushi kérek. eksiche bolghanda, birleshme hökümet qurulidu.
radikal ongchi erkinlik partiyesining bashliqi gért wildérs: «döletni biz bashqurimiz. saylam axirlashti, xelq qararini berdi. emdi bir-birimizning oxshashliqliri üstide izdinishimiz we birlikte tirishishimiz kérek. partiyemiz héchqandaq partiye nezerdin saqit qilalmaydighan 35 orungha ige boldi. biz köp zériktuq. gollandiyening qaytidin dunyada birinchi orungha ötüshini xalaymiz, buni kapaletke ige qilimiz» dédi.
u nos (NOS) téléwiziyesining ziyaritini qobul qilghanda, ilgiriki irqiy ayrimichiliqqa ige gep-sözlirini bir az yumshitishqa tirishqan halda, étnik yiltizi we diniy étiqadi néme bolushidin qetiynezer, hemme kishining bash ministir bolushni xalaydighanliqini, bashqa partiyeler bilen bolghan uchrishishida kélishim hasil qilishni ümid qilidighanliqini qeyt qildi.
u mundaq dédi:
«men ümidwar. her qaysi partiyelrning asasiy qanungha xilapliq qilghan hökümetni xalimaydighanliqini bilimen. jameler, quran we islam mektepliri toghrisida gep qilmaymiz. gollandiyeliklerning ümidi bolghan, <ehmiyet béridighanlirini özlirige qayturup bérish> üstide sözlishimiz .»
