sholz: girétsiye bilen türkiyening yaxshi qoshnidarchiliq munasiwitidin xushalliq hés qilimiz

türkiye awazi radiyosi xewiri: gérmaniye bash ministiri olaf sholz bilen girétsiye bash ministiri kiryakos michotakisning bérlinda körüshkendin kéyin, qoshma muxbirlarni kütüwélish yighini ötküzdi.

sholz türkiye bilen girétsiyening shimaliy atlantik ehdi teshkilati — nato ezasi, girétsiyening yawropa ittipaqi ezasi ikenlikini tilgha élip,  gérmaniyening yéqinqi yillardin buyan ikki dölet munasiwitige yardem bergenlikini éytti.

u bu heqtiki sözlirini dawamlashturup: «biz girétsiye bilen türkiye otturisidiki yaxshi qoshnidarchiliq munasiwitidin xushalliq hés qilimiz... netijide, bu ikki dölet choqum (otturisidiki saqliniwatqan) mesililerni hel qilishi kérek. men girétsiyede yéngi hökümet qurulghandin buyanqi yaxshi alaqini nahayiti qiziqish bilen közitiwatimen. biz yéqin kelgüside girétsiye we türkiye hökümetliri otturisida ötküzülüshi pilanliniwatqan söhbetlerge ümidwarliq bilen qarawatimiz» dégenlerni qeyt qildi.

u yawropa ittipaqi bilen türkiye otturisidiki köchmenler kélishimining eslige keltürülüshi toghrisidiki bir soalgha jawab bérip, yawropa ittipaqining bu mesilini muzakire qilghanliqini we özlirining bu söhbetlerni yéqindin közitiwatqanliqlirini bildürdi.

bash ministir ulaf sholz, bu yerde nezerge élishqa tégishlik her xil mesililerning barliqini bayan qilip: «ularning biri, türkiye qobul qilghan köp sandiki musapirlar mesilisi. buni untup qalmasliq kérek. türkiye öz dölitige nurghun musapirlarni qobul qildi, bizmu bu mushu halette dawamlishishi üchün, ulargha yardemchi boluwatimiz. elwette, buni yawropa döletlirige köchmen kelmeslikini ümid qilip qiliwatimiz» dédi.

sholz, shunga yawropa ittipaqi bilen türkiye otturisidiki köchmenler kélishimining dawamlishishi we tereqqiy qildurulushi kéreklikini tekitlidi.

girétsiye bash ministiri kiriyakos michotakismu girétsiye hökümitining türkiye bilen qanunsiz köchmenlerning aldini élish jehette hemkarliqni téximu tereqqiy qildurushni xalaydighanliqini, yawropa ittipaqining bu kirizisning yükini üstige alghan döletlerge iqtisadiy yardemni köpeytishi kéreklikini otturigha qoydi.