bayérbok pelestin - israiliye mesilisini ikki döletlik hel qilish chariside ching turushni tekitlidi
gérmaniye tashqi ishlar ministiri annalina bayérbok pars qoltuqidiki ereb döletlirini ottura sherqte ikki döletlik hel qilish charisini yolgha qoyush tirishchanliqini dawamlashturushqa chaqirdi.
türkiye awazi radiyosi xewiri: gérmaniye yéshillar partiyesi mensupi siyasetchi, gérmaniye tashqi ishlar ministiri annalina bayérbok jüme küni bashlanghan ereb birleshme xelipiliki, seudi erebistan we israiliye ziyaretliridin ilgiri bayanat bérip: «peqet ikki dölet yanmuyan mewjut bolup turush wedisige qaytip kelgendila, israiliye we pelestinliklerge tinchliq, bixeterlik we izzet – hörmetke ige turmush nésip bolidu» dédi.
u israiliye bilen ereb qoshniliri otturisidiki tinchliq ornitishning tarixiy pursitini «qoldin bérip qoymasliq kérek»likini otturigha qoydi.
ghezzege insanperwerlik yardemlerning ewetilishi, esirlerning qoyup bérilishi yaki rayondiki zorawanliqning yamrap kétishining aldini élish tirishchanliqliridimu, «peqet pars qoltuqidiki ereb döletliri bilen birlikte heriket qilsaqla, muweppeqiyet qazinish pursitimiz bar» dégen bayérbok, ghezze urushida minglarche puqraning hayatining nabut bolushigha qarimay, israiliyening «qilche ikkilenmestin gérmaniyege ishense bolidighanliqi»ni tekitlidi.
bayérbok ghezzediki kishilerning azab - oqubetlirini «melum derijide bolsimu yéniklitish» üchün su, yémeklik we dora qatarliq asasliq éhtiyajlarni jiddiy teminlesh kéreklikini otturigha qoydi.
