dunyada ghezzege munasiwetlik diplomatik tirishchanliqlar dawamlashmaqta
amérika pirézidénti jo baydin isirailiye bash ministiri nétanyahu bilen téléfonda körüshkende, ghezzede puqralarning qoghdilishini, rayongha insanperwerlik yardemlirini yetküzüshni köpeytishni alahide tekitlidi.
türkiye awazi radiyosi xewiri: aqsaray bayanat élan qilip, pirézidént baydinning nétanyahu bilen téléfonda körüshkenlikini bildürdi.
bayanatta, pirézidént baydinning, «isirailiyening térrorluqqa qarshi puqralirini qoghdashta her türlük hoquqi we mesuliyitining barliqini, buning xelqaraliq insaniy heq-hoquq ramkisida élip bérilishi kéreklikini tekitlidi» déyildi.
bayanatta yene mundaq déyildi: «pirézidént baydin ghezzediki puqralirining éhtiyajlirini qamdash üchün insanperwerlik yardemlirining yetküzülüshini derhal we muhim miqdarda köpeytilishi kéreklikini tekitlidi. ikki rehber qerellik halda özara pikir almashturushni dawamlashturush mesiliside pikir birliki hasil qildi.»
aqsaray dölet xewpsizlik meslihetchisi jéyk sulliwanmu xelqara qanun boyiche doxturxanilarning hujum nishani qilinmasliqi kéreklikini tekitlep, doxturxanilarning herbiy nishan emeslikini bildürdi.
gollandiye waqitliq hökümitining bash ministiri mark rutté isirailiye bash ministiri nétanyahu bilen téléfonda körüshkende, ghezzege insanperwerlik yardemlirini yetküzüshke ruxset qilishni we herbiy herikette salmaq bolushni chaqiriq qildi.
u yene körüshüshte, ikki döletlik hel qilish chare telipini tilgha aldi.
u engliye bash weziri rishi sunak bilenmu körüshüp, ghezzediki insaniy weziyet mesililirinimu muzakire qildi.
u «musteqil pelestin döliti» mesiliside, engliye bash weziri bilen oxshash pikirge ige ikenlikini qeyt qildi.
u firansiye pirézidénti makron bilen körüshkende, ikki döletlik hel qilish charesige munasiwetlik mesililerni muzakire qilghanliqini bildürdi.
firansiye pirézidénti makron éks (X) taratqusida bayanat élan qilip, ghezze xelqini qoghdash üchün insaniy urush toxtitish chaqiriqini tekrarlidi.
aljiriye pirézidénti abdulmejid tebbun pelestinliklerning térrorist emeslikini, ularning wetinini qoghdawatqanliqini, ghezzede yüz bergen ishlarning pütünley urush jinayiti ikenlikini bildürdi.
isirailiyening 7-öktebir (2023) din buyan ghezzede qilghan bombardimanlarda 8 mingdin artuq kishi jénidin ayrildi, 20 mingdin artuq kishi yarilandi.
