yawropa ittipaqi tinchliq konféransi ötküzüshni qollaydu
yawropa ittipaqi isirailiye-pelestin toqunushini axirlashturidighan tinchliq konféransining pat yéqinda ötküzülüshi mumkinlikini, emma konféransta hamasning bir rolining bolmaydighanliqini bildürdi.
türkiye awazi radiyosi xewiri: yawropa ittipaqi kéngishi bashliqi charléz mishél bilen yawropa ittipaqi komitéti bashliqi ursula fondérléyén bélgiye paytexti biryussélda chaqirilghan yawropa ittipaqi rehberler yighinidin kéyin, muxbirlarni kütüwélish yighini ötküzdi.
ikki rehber yawropa ittipaqi térrorluq teshkilati dep qobul qilidighan hamasning isirailiyege qilghan hujumini eyiblidi we bir qanche kündin buyan isirailiye bombardiman qiliwatqan ghezzege insanperwerlik yardemlirini téz sürette yetküzüshning ehmiyitini tekitlidi.
yawropa ittipaqi kéngishi bashliqi mishél isirailiye-pelestin mesilisini hel qilish üchün yawropa ittipaqining yillardin buyan qollap kelgen ikki döletlik hel qilish charesining, birdinbir chare ikenlikini tekrarlidi.
u yawropa ittipaqining buningda muhim rol oynashni xalaydighanliqini bildürüp: «yawropada yaki bashqa bir yerde pat yéqinda tinchliq konféransi ötküzüsh pikrini qollaymiz. konféransni rayonda sijil muqmiliqni kapaletke ige qilidu, dep oylaymiz. ochuqini éytsaq, hamas térrorluq teshkilati hésablinidu. bu sewebtin, yawropa ittipaqi qatnishidighan xelqaraliq konféransta hamasning héchqandaq roli bolmaydu, dep oylaymen» dédi.
yawropa ittipaqi rehberler yighinining xitabnameside, isirailiye-pelestin mesilisi toghrisida tinchliq konféransi ötküzüsh pikrige orun ajritildi.
xitabnamede, «yawropa ittipaqi tinchliq küchi tirishchanliqlirini öz ichige alghan mesilini ikki döletlik hel qilish charesi asasida siyasiy musapining janlandurulushigha töhpe qoshushqa teyyar. yawropa ittipaqi diplomatik tinchliq we bixeterlik tirishchanliqlirini qizghin qarshi alidu. pat arida xelqaraliq tinchliq konféransining ötküzülüshini qollaydu» déyildi.
yawropa ittipaqi, ereb ittipaqi, seudi erebistan, misir we iyordaniye ötken ay (2023-yili séntebir) niyu yorkta ötküzülgen 78-nöwetlik b d t omumiy kéngishi yighinida, isirailiye bilen pelestin kélishim hasil qilghanda qolgha keltüridighan menpeetlirini eng yuqiri sewiyege chiqirip tinchliqni teshebbus qilishni meqset qilghan «tinchliq küni tirishchanliqi» namliq paaliyetni bashlighan idi.
