amérika bilen rusiye xewpsizlik kéngishide bir - birlirining qarar layihelirini ret qildi

türkiye awazi radiyosi xewiri: 15 ezasi bar bolghan b d t xewpsizlik kéngishide aldi bilen amérika qoshma ishtatlirining qarar layihesi üchün bélet tashlandi؛ layiheni 10 dölet qollidi, ikki dölet bélet tashlashtin waz kechti, üch dölet ret qildi. ret qilip bélet tashlighan rusiye bilen xitay xewpsizlik kéngishi daimiy ezasi bolghachqa, layihe ret qilinghan boldi.

ereb birleshme xelipilikimu amérikaning qanun layihesige qarshi bélet tashlidi.

amérikaning b d t da turushluq daimiy wekili linda tomas girinfild bélet tashlashtin kéyin bayanat élan qilip: «amérika rusiye we xitayning (layiheni) ret qilip bélet tashlighanliqidin qattiq ümidsizlendi» dédi.

tomas girinfilid amérika qarar layihesining keskin söhbet netijiside otturigha qoyulghan küchlük we tengpung layihe ikenlikini otturigha qoydi.

xitayning b d t diki daimiy wekili jang jung, layiheni «qalaymiqan we simmétirik bolmighan küch ishlitish» ni axirlashturushqa chaqirmighanliqi üchün ret qilghanliqlirini bildürdi.

u yene, bu qarar layihesining ghezzediki elehli babtist doxturxanisigha qilinghan hujumni tekshürüsh telipini öz ichige almaydighanliqini eskertti.

amérikaning xewpsizlik kéngishide ret qilinghan qarar layiheside «hamasning 7- öktebir (2023) diki térrorluq hujumliri qattiq eyiblendi» we herqaysi döletlerning özini qoghdash hoquqi barliqi otturigha qoyuldi.

ret qilinghan bu layihede, «insanperwerlik urush toxtitish» ning zörürlüki we ghezzege sijil yardem bérishning muhimliqi tekitlendi.

amérika layihesi, herqaysi tereplerni xelqara qanundiki mejburiyitini ada qilishqa chaqiriq qilish bilen «ghezzediki hamasni öz ichige alghan barliq térrorluq teshkilatlirini qoral bilen teminlesh» ning aldini élish üchün, tedbir qollinish telipinimu öz ichige alidu.

amérikaning layihesige bélet tashlinip bolghandin kéyin, rusiyening ghezzede insaniy urush toxtitishni telep qilghan qarar layihesi awazgha qoyuldi؛ rusiyening layihesi töt döletning qollishi, toqquz döletning bélet tashlashtin chékinishi we ikki döletning ret qilishigha uchridi.

netijide, rusiyening daimiy ezalardin amérika qoshma ishtatliri bilen engliyening qarshi turushigha uchrighan qarar layihesimu ret qilindi.

rusiyening b d t da turushluq daimiy wekili wassiliy nébénziya bélet tashlashtin kéyin bayanat élan qilip, herqaysi döletlerning özlirining milliy menpeetini közde tutup heriket qilghanliqini bildürdi we layiheni ret qilip bélet tashlighan döletlerni «qorqunchaqliq qilish» bilen eyiblidi.

amérikaning  b d t da turushluq muawin daimiy wekili robért wud rusiyening qarar layihesi heqqide toxtilip: özining bu layihe üchün «waqtini israp qilmaydighanliqi» ni we uning «emeliy meydandiki pakitni eks ettürmeydighanliqi» ni otturigha qoydi.

engliyening b d t da turushluq daimiy wekili barbara wodward: «engliye rusiyening qanun layihesini qolliyalmaytti, chünki u israiliyening özini qoghdash hoquqini tilgha élishni nezerdin saqit qilghanidi» dédi.

rusiyening ret qilinghan qarar layiheside, ghezzediki insanperwerlik weziyitining künséri nacharlishiwatqanliqi otturigha qoyulup, weziyetning pütkül rayonning bixeterliki we tinchliqigha xewp élip kelgenliki tekitlingenidi.

«her qaysi terepler hörmet qilidighan téz sürette daimiy insanperwerlik urush toxtitish»ni kapaletke ige qilishqa chaqirilghan layihede, buning insanperwerlik yardemlirining yetküzülüshige we puqralarni qoghdashqa töhpe qoshidighanliqi otturigha qoyulghanidi.

qarar layihesi yene, «hamasning dehshetlik hujumliri» ni eyiblesh we tutqunlarni qoyup bérish chaqiriqinimu öz ichige alatti.

ghezzening toluq qamal qilinishini ret qilghan qarar layiheside, israiliye armiyesining bu rayonlarni tarqaqlashturush buyruqini qayturuwélishi kérekliki tekitlengenidi.

rusiyening ret qilinghan qanun layiheside yene, herqaysi terepler xelqara qanundiki mejburiyitini ada qilishqa chaqirilghanidi.