téhran: amérika bizge ikki qétim uchur yollidi
iran tashqi ishlar ministiri hüseyin emir abdullahiyan amérikaning téhrangha ikki qétim uchur ewetkenlikini bildürdi.
türkiye awazi radiyosi xewiri: iran tashqi ishlar ministiri hüseyin emir abdullahiyan paytext téhranda ötküzgen muxbirlarni kütüwélish yighinida, iranning özining diniy, milliy we insanperwerlik qimmet qarishi dairiside pelestinning israiliye ishghaliyitige qarshi turush herikitini qollaydighanliqini ochuq jakarlap kelgenlikini, buning bir mexpiyetlik emeslikini éytti.
u israiliyening pelestin zéminini ishghal qiliwalghan küch ikenlikini bayan qilip: «xelqara qanungha asasen, zéminliri ishghal qiliwélinghanlar qorallansa we qoral- yaragh ishlitip özini qoghdisa bolidu. bir qisim gherb döletliri, bolupmu amérikaning kontrolluqidiki israiliye ishghaliyitini körmeske salmaqta. ular hamas (pelestin islamiy qarshiliq körsitish herikiti) we pelestin qarshiliq körsitish herikitini eyibleshning koyida» dédi.
amérika we gherb döletlirining hizbullahqa «israiliyege qarshi yéngi firont achmasliq toghrisida hazirgha qeder <onlarche uchur> ewetkenliki»ni bildürgen ministir abdullahiyan, sözini dawamlashturup: «amérika iranghimu ikki qétim uchur ewetti. birinchiside ular <biz urushni kéngeytishni xalimaymiz> dédi. ikkinchiside, irandin özini tutuwélishni telep qildi. amérika urushni kéngeytishni xalimaydighanliqini ilgiri sürüwatqan bolsimu, emma yene bir tereptin, ikki hepte ilgiri ewetken qorallar bilen pelestinlik puqralar, balilar we ayallargha qiliniwatqan ghezzediki hujumlarni qollaydighanliqini ispatlidi. men bu yerdin (amérika pirézidénti jo ) baydingha xitab qilimen: riyakarliqqa xatime ber. saylam riqabiti jeryanida dunyagha wede qilghan kishilik hoquq mushumidi?» dégenlerni qeyt qildi.
