xelqaraliq jemiyetler doxturxana hujumini eyiblidi
b d t bash katipi antoniyo gutérrés ghezzediki elehli baptist doxturxanisigha qilinghan hujumni eyiblidi.
türkiye awazi radiyosi xewiri: b d t bash katipi antoniyo gutérrés ijtimaiy taratqu adrésida, isirailiyening elehli baptist doxturxanisigha qilghan hujumi toghrisida uchur hembehrlidi.
u yüzlerche pelestinlikning ölümige seweb bolghan doxturxana hujumidin qattiq chöchügenlikini bildürüp: «bu hujumni qattiq eyibleymen. qurbanlarning aililirige hésdashliq qilidighanliqimni éytimen. doxturxanilar we sehiye xadimliri xelqara qanunning qoghdishi astida» dédi.
b d t xewpsizlik kéngishi rusiye we ereb birleshme xelipilikining chaqiriq qilishi bilen, ghezzediki elehli bapsit doxturxanisi hujumini muzakire qilish üchün bügün (18-öktebir) shu yer waqti 10.00, enqere waqti 17.00, ürümchi waqti 20.00 de toplinidu.
pelestinning b d t diki daimiy wekili riyad mensur niyu yorktiki b d t binasida ereb guruppisi namida bayanat élan qilip: «isirailiye küchliri teripidin qilinghan qetliamni qattiq eyibleymiz. bu jinayetni ötküzgenler jazagha tartilishi kérek. eger xewpsizlik kéngishi wezipisini ada qilip, tünügün toqunushni toxtitalighan bolsa xelqimizge qarshi jinayet ötküzülmigen bolatti, 500 kishi biz bilen bille bolatti. b d t xewpsizlik kéngishi emdi oyghinishi kérek. b d t ning bu jinayetni eyiblesh bilenla qalmay, derhal urush toxtitishni kapaletke ige qilishi kérek» dédi.
ereb ittipaqimu isirailiyening ghezzediki elehli bapsit doxturxanisigha qilinghan hujum sewebidin bayriqini yérim chüshürdi we üch künlük matem élan qildi.
islam hemkarliq teshkilati yüzlerche kishining jénidin ayrilishigha seweb bolghan isirailiyening ghezzediki elehli bapsit doxturxanisigha qilghan hujumini «teshkillik dölet térrorluqi» dep atidi.
islam hemkarliq teshkilatining bayanatida, isirailiyening ghezzediki doxturxanisigha qilghan qetliamini shiddet bilen eyiblep, buning «insaniyetke qarshi jinayet» we «urush jinayiti» ikenlikini tekitlidi.
isirailiyening tünügün (2023-yili 17-öktebir) kechte ghezzediki elehli bapsit doxturxanisini bombardiman qilishi netijiside 500 kishi jénidin ayrilghan idi.
