isirailiyede jiddiy halet hökümiti quruldi
isirailiye parlaménti hamas bilen dawamlishiwatqan toqunush boyiche küchke ige bolidighan «jiddiy halet hökümiti» ning qurulushini testiqlidi.
türkiye awazi radiyosi xewiri: isirailiye parlaménti bayanat élan qilip, «hamas bilen urush dawamlashqan muddette küchke ige bolidighan jiddiy halet hökümitining töt awazgha qarshi 64 awazning qollishi bilen testiqlanghanliqi» ni bildürdi.
bayanatta, chong öktichi partiyening rehbiri we sabiq bash ministir yair lapidning bu hökümetke qatnashmighanliqi eskertildi.
jiddiy halet hökümiti kélishimining, isirailiyening ichki jehettin bölünüshige we keng kölemlik namayishlargha seweb bolghan «sot islahati» mesilisining tonglitilishini öz ichige alidighanliqi qeyt qilinghan bayanatta, «toqunush mezgilide, toqunushqa munasiwetlik bolmighan, hökümet qollighan qanun teklip-layihelirining parlaméntqa sunulmaydighanliqi tekitlendi.»
isirailiye dölet téléwiziyesi kan (KAN) ning xewiride körsitilishiche, jiddiy halet hökümiti, bash ministir nétanyahu bilen öktichi partiye ezaliridin bénniy gantz otturisida, gantzning «kök-aq» partiyesining besh ezasining ministir bolushigha munasiwetlik tüzülgen kélishim netijiside qurulghan.
«kök-aq» partiyesining besh ezasi qatnashqan kabént ichidin sabiq dölet mudapie ministiri gantz bilen hazirqi dölet mudapie ministiri yoaw gallant we bash ministir nétanyahularmu orun aldi.
hamasning herbiy qaniti qassam birigadiliri shenbe (2023-yili 7-öktebir) küni israiliyege «eqsa topani» namliq keng kölemlik hujum qozghighanliqini élan qilghan idi. ghezzedin israiliyege minglighan rakétalar étilghan we qoralliq guruppilar rayondiki yehudiy olturaq rayonlirigha bésip kirgen idi.
israiliye armiyesi shuningdin kéyin, urush ayropilanliri bilen ghezze rayonigha qarshi «tömür qilich» herikitini qozghighanliqini élan qilghan idi.
ikki tereptning künséri keskinlishiwatqan toqunushlirida, yüzligen kishi jénidin ayrildi.
