kishilik hoquqni közitish teshkilati: israiliye aq fosfor ishletti

türkiye awazi radiyosi xewiri: kishilik hoquqni közitish teshkilati ijtimaiy taratqu supisi <X>  tiki adrésida bayanat élan qilip: «israiliye ghezze we liwandiki herbiy heriketliride aq fosfor ishlitip, puqralarni éghir we uzun muddetlik yarilinish xewipige duchar qildi» dédi.

aq fosforning chidighusiz köyüshni keltürüp chiqiridighanliqi we öylerge ot qoyuwétidighanliqi eskertilgen bayanatta, ahale zich olturaqlashqan rayonlarda aq fosfor ishlitishning qanungha xilap ikenliki tekitlendi.

pelestin tashqi ishlar ministirliqining ijtimaiy taratqu supisi <X>  tiki adrésida élan qilinghan bayanatida: «ishghaliyetchi israiliye pelestinliklerge qarshi xelqarada cheklengen aq fosforni ishlitiwatidu» dégen ibarilerge orun bérildi.

liwan hizbullahi, liwan jenubiy chégrasidiki daxayra bazirining uduligha jaylashqan israiliye herbiy rayonigha bashqurulidighan bomba bilen hujum qilghanliqini élan qilghanidi.

liwan resmiy xewer agéntliqi —NNA, bashqurulidighan bomba qoyup bérilip uzun ötmeyla daxayra baziri etrapidiki rayonning zembirek hujumigha, yarén baziri etrapidiki rayonlarning fosfor bombisi hujumigha uchrighanliqini xewer qilghanidi.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» shenbe küni israiliyege qarshi «eqsa topani» namliq keng kölemlik hujum qozghighanliqini élan qilip, ghezzedin israiliyege qaritip minglarche rakétamiyot atqan we qoralliq guruppilar rayondiki ahaliler rayonlirigha basturup kirgenidi.

arqidin israiliye armiyesi urush ayropilanliri bilen ghezzege qarshi «tömür qilichlar» herikitini qozghighanliqini élan qilghanidi.

künséri keskinlishiwatqan toqunush jeryanida ikki tereptin yüzlerche kishi talapetke uchridi.