israiliye we pelestin terep urushta ölgen we yarilanghanlar sanini élan qildi

türkiye awazi radiyosi xewiri: israiliyening ghezzege qaratqan hujumlirida hayatidin ayrilghanlar sani 1200 ge yéqinlashti.

ghezzening muawin sehiye ministiri doxtur yusup eburrish: «shéhitlerning sani 1200 ge yéqinlashti, texminen besh ming adem yarilandi» dédi.

ebburish hujumda qaza qilghan we yarilanghanlarning köpinchisining balilar, ayallar we yashanghanlar ikenlikini eskertti.

israiliye sehiye ministiri moshé arbél bayanat élan qilip, israiliyege hujum qilish jeryanida yaridar halette qolgha chüshürülgen pelestinliklerning dawalanmaydighanliqini bildürdi.

israiliyening «yediot axronot» gézitining xewirige qarighanda, israiliye sehiye ministiri arbél tünügün bash ministir bényamin nétanyahugha mektup yézip, hujumda yarilanghan hamas (pelestin islamiy qarshiliq körsitish herikiti) ezalirini hökümet doxturxanilirida dawalashni toxtitishqa buyrughanliqini bildürgenlikini élan qilghan.

mektupida: «sehiye sistémisi bundaq qiyin waqitlarda israiliye eskerlirini dawalashqa we kelgüsidiki ishlargha teyyarliq qilishqa ehmiyet bérishi kérek» dégen ibarilerge orun bergen arbél, öz bashqurushidki ammiwi sehiye sistémisining hamas ezalirini dawalimaydighanliqini  uqturghan.

israiliye sehiye ministirliqi israiliye – pelestin toqunushi bashlanghan 7- öktebirdin buyan yarilanghan 3268 kishining doxturxanilarda balnistqa élinghanliqini élan qildi.

israiliyening dölet igilikidiki resmiy qanili — KAN, hamasning qoralliq qaniti bolghan izzuddin qessam birigadasining muhasire astidiki ghezzedin israiliyege qarshi bashlighan «eqsa topani» hujumlirida ölgenler sanining 1300 ge yetkenlikini xewer qildi.

xewerde körsitilishiche, hujumda yarilanghan israiliyelikler sani 350 ining yarilinish ehwali éghir bolup, 3300 ge yetken.

israiliye armiyesining bu heqtiki bayanatidimu, 7- öktebirdin buyan öltürülgen eskerler sanining 220 ikenliki qeyt qilindi.

bayanatta, öltürülgen yene 31 eskerning kimlikining ashkarilinishigha ruxset qilinghanliqi we ularning aile-tawabiatlirining waqiplandurulghanliqi eskertildi.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» shenbe küni israiliyege qarshi «eqsa topani» namliq keng kölemlik hujum qozghighanliqini élan qilip, ghezzedin israiliyege qaritip minglarche rakétamiyot atqan we qoralliq guruppilar rayondiki ahaliler rayonlirigha basturup kirgenidi.

arqidin israiliye armiyesi urush ayropilanliri bilen ghezzege qarshi «tömür qilichlar» herikitini qozghighanliqini élan qilghanidi.