b d t israiliye we pelestindiki tereplerni urush toxtitish yaki insaniy urush toxtitishqa chaqirdi

türkiye awazi radiyosi xewiri: b d t insanperwerlik ishlirini maslashturush ishxanisining ghezzege mesul emeldari hemade elbeyari ishxanining organ torida bayanat élan qilip: «hazirqi basquchtiki qilishqa tégishlik birinchi muhim ish urush toxtitish yaki insaniy weziyetni nezerde tutup urush toxtitish. shundaq bolghanda, yardem bergüchiler weziyetni muhakime qilalishi mumkin. hazirgha qeder weziyetni muhakime qilghudek bixeter muhitqa érishelmiduq» dédi.

«ghezzediki weziyetning intayin xeterlik ikenliki éniq. wehimilik sharait ilgiriki her qandaq waqittikidinmu éghir bolushi mumkin» dégen beyari, hazirqi ehwalda yardem bérishningmu xeter astida ikenlikini qeyt qildi.

u sheherdiki weziyet toghrisida toxtilip: «birdinbir éléktr istansisi yéqilghu bolmighachqa, meshghulatini toxtitishqa mejbur bolup qaldi. bu ehwal ghezzeliklerning saghlamliq we su mulazimitidin behrimen bolushigha passip tesir körsitidu. menbe kemchil, tashqi dunya bilen ghezze otturisidiki ötüshme éghizliri pütünley taqilip qaldi, sheherdiki teminlesh zenjiri üzüldi» dédi.

b d t ning pelestin musapirlirigha yardem bérish orgini (UNRWA) teyyarlighan merkezlerde panahliniwatqanlar sanining 280 mingdin éship ketkenlikini bidlürgen beyari, organgha qarashliq bezi merkezlerning musapirlarni orunlashturushqa mas kelmeydighanliqini sözlirige ilawe qildi.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» shenbe küni israiliyege qarshi «eqsa topani» namliq keng kölemlik hujum qozghighanliqini élan qilip, ghezzedin israiliyege qaritip minglarche rakétamiyot atqan we qoralliq guruppilar rayondiki ahaliler rayonlirigha basturup kirgenidi.

arqidin israiliye armiyesi urush ayropilanliri bilen ghezzege qarshi «tömür qilichlar» herikitini qozghighanliqini élan qilghanidi.

künséri keskinlishiwatqan toqunush jeryanida ikki tereptin yüzlerche kishi talapetke uchridi.