خەلقئارا جىنايى ئىشلار سوت مەھكىمىسى سۈرىيە ئۈستىدىن سۇنۇلغان ئەرزگە قاراپ چىقىشنى باشلىدى

تۈركىيە ئاۋازى رادىيوسى خەۋىرى: خەلقئارا جىنايى ئىشلار سوت مەھكىمىسى گوللاندىيە بىلەن كانادانىڭ «سۈرىيە ھاكىمىيىتىنىڭ بىرلەشكەن دۆلەتلەر تەشكىلاتى (ب د ت)نىڭ 1984- يىلى ئېلان قىلىنغان قىيىن- قىستاققا قارشى تۇرۇش ئەھدىنامىسىگە خىلاپلىق قىلغانلىقى»نى ئوتتۇرىغا قويۇپ، سۇنغان ئەرزىگە قاراپ چىقىشنى باشلىدى.

سوتنىڭ بىرىنچى كۈنىدە، كىشىلىك ھوقۇقنى كۆزىتىش تەشكىلاتىنىڭ خەلقئارا ئەدلىيە ئىشلىرى دىرېكتورى بالقېس جەرراھ سۆز قىلىپ: «سوت مەھكىمىسى جىددىي تەدبىر قوللىنىپ، ۋەھىمىلىك شەرت – شارائىتلار ئاستىدا ئازاب - ئوقۇبەت چېكىۋاتقان ھاياتى ئېغىر خەتەر ئىچىدىكى سۈرىيەلىكلەرگە داۋاملىق زىيانكەشلىك قىلىنىشىنىڭ ئالدىنى ئېلىشى كېرەك» دېدى.

كانادا بىلەن گوللاندىيە 6- ئاينىڭ 8- كۈنى ئىچكى ئۇرۇش باشلانغان 2011 – يىلىدىن بۇيان سۈرىيە ھاكىمىيىتىنىڭ قىيىن – قىستاق، زۇلۇم، غەيرىي ئىنسانىي ۋە ياكى كەمسىتىش مۇئامىلىلىرىنى سادىر قىلغانلىقى ياكى جازالارنى يۈرگۈزگەنلىكىنى، بۇنىڭ ب د ت ئەھدىنامىسىگە خىلاپ ئىكەنلىكىنى ئوتتۇرىغا قويۇپ، سۈرىيە ھاكىمىيىتى ئۈستىدىن خەلقئارا جىنايى ئىشلار سوت مەھكىمىسىگە ئەرز سۇنغانىدى.