liwiyede kelkün apitide hayatidin ayrilghanlar sani 4 ming 333 ke yetti

türkiye awazi radiyosi xewiri: dunya sehiye teshkilati liwiye ishliri ishxanisi jiddiy qutquzush guruppisining mesuli hale xudari liwiyediki kelkün apiti heqqide torda doklat bérish yighini ötküzdi.

xudari liwiyede yüz bergen boran-chapqun sewebidin qaza qilghanlar sanining 4 ming 333 ke köpeygenlikini, jeset toplash paaliyetlirining dawamlishiwatqanliqini qeyt qildi.

u apet rayonida 8500 kishining yoqap ketkenlikini, qaza qilghan 101 sehiye xadimining ichide 25 doxturningmu barliqini tekitlep mundaq dédi: «bu liwiyediki sehiye tarmaqliri üchün zor yoqitish hésablinidu.»

aqdéngizgha tesir körsetken we 10-séntebir küni liwiyening sherqige éghir talapet yetküzgen «daniyal» namliq boran - chapqun apiti, binghazi, beyza, merj, suse we derne sheherliride kelkün apetlirini keltürüp chiqarghanidi.

liwiye milliy birlik hökümitining bash ministiri abdulhemid dibeybe 11-séntebir küni kelkün apiti sewebidin dölet miqyasida üch künlük matem élan qilghanidi.

 liwiye pirézidént kéngishimu qérindash döletler bilen xelqaraliq teshkilatlarni kelkün apitide talapetke uchrighan rayonlargha yardem bérishke chaqirghanidi.

birleshken döletler teshkilati insanperwerlik ishlirini maslashturush ishxanisi teripidin 10-ayning 2-küni élan qilinghan doklatta bildürülüshiche, liwiyediki kelkün apiti sewebidin 4 ming 255 kishi hayatidin ayrilghan, 250 ming kishi talapetke uchrighan, 40 ming kishi öy – makanliridnn ayrilip qalghan.