firansiye eskerliri nigérdin chékinishke bashlidi

türkiye awazi radiyosi xewiri: firansiye armiye ishtabi nigérdiki eskerlerni chékindürüsh ishlirining bashlanghanliqi toghrisida bayanat élan qildi.

bayanatta,  pirézidént makronning nigér bilen bolghan herbiy hemkarliqlar axirlashqanliqi sewebidin, u dölette 10 yildin artuq waqittin béri wezipe ijra qilghan firansiye eskerlirini 24-séntebir (2023) chékindürsh toghrisida perman chüshürgenliki bildürüldi.

bayanatta, firansiyening nigérdiki herbiy qisimlirini chékindürüsh xizmetlirining mushu yil (2023) axiridin ilgiri axirlishidighanliqi eskertildi.

nigérda pirézidént muhemmed bazum 26-iyul (2023) pirézidéntliq mehkimisi muhapizet birigadisi teripidin nezerbent astigha élinghan bolup, shu küni axshimi armiye herbiy özgirish qozghap hakimiyetni tartiwalghan idi.

nigér pirézidéntliq mehkimisi muhapizet birigadisining qomandani général abdurrahmané tchyani 28-iyul qurulghan waqitliq hökümetning bashliqi bolghan idi. u 10-awghust esker we puqralardin teshkil tapqan 21 kishilik ichki kabént élan qilghan idi.

yéngi nigér hökümiti shuningdin kéyin, firansiye bilen bolghan herbiy kélishimlerni emeldin qaldurghanliqini élan qilip, dölettiki firansiye herbiy qisimlirining chiqip kétishini we hetta firansiye bash elchisiningmu chégradin chiqip kétishini telep qilghan idi.

firansiye deslepte bu teleplerni orunlimaydighanliqini élan qilghan bolsimu, emma bash elchi ötken hepte nigérdin chiqip kétishke mejbur bolghan idi.