taliban rayon döletlirini özi bilen «resmiy hemkarliq» ornitishqa chaqirdi

türkiye awazi radiyosi xewiri: taliban waqitliq hökümitining muawin tashqi ishlar ministiri emirxan mutteqi rusiye fédératsiyesige qarashliq tataristan jumhuriyitide chaqirilghan afghanistan toghrisidiki 5- nöwetlik «moskwa formati» yighinida söz qilip: «bolupmu rayondiki döletlerning bizge oxshimighan hökümet sheklini tewsiye qilishni qoyup, biz bilen her sahede resmiy hemkarlishishini ümid qilimiz» dédi.

u rayon xaraktérlik qatnash türlirini afghanistangha merkezleshtürüsh peytining yétip kelgenlikini bayan qilip, taliban hökümitining bu jehette barliq zörür qolayliqlarni yaritip bérishke teyyar ikenlikini éytti.

mutteqi ötken ikki yilda özlirining héchqandaq yardemge mohtaj bolmastin döletning bixeterlikige kapaletlik qilghanliqlirini, xamchotni musteqilleshtürgenliklirini, zeherlik chékimlikke qarshi turushta ghelibe qilghanliqlirini, sodini kücheytkenliklirini, dölet tewelikini bésip ötüsh ishlirini asanlashturghanliqlirini bildürdi.

taliban hökümitining qisqa waqit ichide afghanistandiki siyasiy, iqtisadiy we bixeterlik asasini qayta qurghanliqigha isharet qilip ötken mutteqi, talibanning öktichi teshkilatlargha qarshi küreshni tézlitip, «daésh»ning barliq panahlinish orunlirini weyran qilip tashlighanliqini bildürdi.

u afghanistan zéminlirining dunyagha, bolupmu rayondiki döletlerge héchqandaq tehdit élip kelmeydighanliqini tekitlidi.

ötken 45 yilda atalmish ​​sighdurushchan hökümetler uqumining héchqandaq mesilini hel qilalmighanliqini bayan qilghan mutteqi, shunga özlirining xelqning dini, tarixi, medeniyiti we siyasiy réalliqini nezerge alghan diniy we milliy qanuniyliqqa ige hökümet qurghanliqlirini qeyt qildi.

rusiye, xitay, hindistan, iran, pakistan, qazaqistan, qirghizistan, özbéksitan, tajikistan we türkmenistan qatarliq döletler ishtirak qilghan tataristanning paytexti qazandiki yighingha türkiye, seudi erebistan, ereb birleshme xelipiliki we qatar wekil ewetti.