nato kosowodiki tinchliq saqlighuchi qisimning esker sanini köpeytidu
shimaliy atlantik ehdi teshkilati — nato bash katipi yéns stolténbérg kosowodiki tinchliq saqlighuchi qismigha qoshumche esker ewetishni testiqlighanliqlirini uqturdi.
türkiye awazi radiyosi xewiri: bash katip yéns stolténbérg kosowoning omumiy weziyiti toghrisida yazma bayanat élan qilip, natoning qarar chiqirish orgini bolghan shimaliy atlantik okyan kéngishining kosowodiki weziyetni muzakire qilghanliqini bildürdi.
u kosowo tinchliq saqlash qisimlirining kosowodiki mewjutluqining ehmiyitini tekitlep: «kosowoda yashaydighan kishilerning bixeter muhit we heriket erkinlikining izchilliqigha kapaletlik qilish üchün zörür bolghan barliq paaliyetlerni élip barimiz. biz bu ishni birleshken döletler teshkilatidin alghan salahiyetke asasen bitereplikni saqlighan asasta qilimiz» dédi.
stolténbérg kosowoda jiddiychilik küchiyip ketken 5- aydin buyan kosowodiki tinchliq saqlighuchilar qisimlarning mewjudiyitini kücheytkenliklirini tilgha élip, shimaliy atlantik okyan kéngishining tünügün nöwettiki weziyetni nezerde tutup, natogha u yerge qoshumche esker ewetish salahyiti bergenlikini éytti.
u: «qomandanliqimiz kosowo tinchliq saqlash qisimlirining hoquqini yürgüzüshige kapaletlik qilish üchün, kéreklik menbeler bilen teminleshni dawamlashturidu. zörür tépilghanda, kosowo tinchliq saqlash qisimlirining orunlashturulushida tengshesh élip bérishqimu teyyarmiz» dédi.
stolténbérg kosowodiki tereplerni jiddiylikni peseytishke chaqirip, bélgrad we prishtinaning otturisidiki saqliniwatqan mesililerni hel qilish üchün, yawropa ittipaqi qolayliq yaritp bergen söhbet musapisini dawamlashturushi kéreklikini tekitlidi.
kosowoning shimalida uda bir nechche aydin buyan dawamlishiwatqan jiddiylik, 24- séntebir etigende köp sanliq ahalisi sériblardin terkib tapqan banzhska yolini tosuwalghan qoralliq sérblarning bir saqchini étiwétishidin kéyin qaytidin ewjige chiqqanidi.