burkina fasodiki herbiy - siyasiy özgirish qozghashqa urunush herikiti meghlubiyetke uchridi
burkina faso herbiy hakimiyiti 26- séntebir bir qétimliq siyasiy özgirish qozghashqa urunush herikitini basturghanliqini élan qildi.
türkiye awazi radiyosi xewiri: herbiy hakimiyet siyasiy özgirish bolghanliqi toghrisidiki uchurlarning tarqilishi bilen nurghun namayishchining kochilargha chiqishini keltürüp chiqarghan weqeler heqqide bayanat élan qilip, burkina faso istixbarat we bixeterlik tarmaqlirining bir qétimliq siyasiy özgirish qozghashqa urunushining aldini alghanliqini uqturdi.
siyasiy özgirish qozghashqa urunush herikitige qatnashqan nurghun kishining qolgha élinghanliqigha isharet qilinghan bayanatta, hökümetning weqeni toluq aydinglashturidighanliqi tekitlendi.
bixeterlik qisimlirining siyasiy özgirishke qatnashqandin kéyin qéchip ketkenlerni izdewatqanliqi bildürülgen bayanatta, siyasiy özgirish qozghashqa urunghanlarning döletni malimanchiliqqa sörep kirmekchi bolghanliqi ilgiri sürüldi.
9- ayning 26- küni siyasiy özgirish yüz bergenliki toghrisida mish- mish paranglar tarqalghandin kéyin, nurghunlighan kishiler paytext wagaduguda kochilargha chiqip, dölet rehbiri ibrahim troréni qollap shoarlarni towlighanidi.
texminen 20 milyon nopusqa ige burkina faso musteqilliqini qolgha keltürgen 1960- yilidin buyan 10 qétimgha yéqin herbiy siyasiy özgirishni bashtin kechürdi.
térrorluq weqeliri köpiyip qalghandin kéyin, 2022- yili yanwarda léyténant polkownik paul- hénri sandago damiba teripidin tartiwélinghan hakimiyetni 2022- yili 9- ayda kapitan ibrahim troré herbiy - siyasiy özgirish qozghap aghduruwetkenidi.
troré siyasiy özgirishtin bir ay kéyin qesem bérip, döletning ötkünchi pirézidénti süpitide wezipe öteshni bashlighanidi.
