erméniyede sekkiz kishi hoquqni mejburiy tartiwélishni pilanlash bilen eyiblinip qolgha élindi

türkiye awazi radiyosi xewiri: erméniye resmiy xewer agéntliqi — ermen pirés, erméniye dölet bixeterlik idarisi bilen tekshürüsh idarisi xadimliri ichkirilep éniqlash arqiliq yette nepiri «<ehli selip> herbiy wetenperwerler jemiyiti teshkilati» ezasi bolup, jemiy sekkiz ademning qolliridiki qoral we oq - dorilarni  bash ministir nikol pashinyan we hökümetning bashqa ezalirigha qarshi jinayi qoral qilip ishlitip, hoquqni tartiwélish toghrisida kélishim hasil qilghanliqini pash qilghanliqini xewer qildi.

xewerde körsitilishiche, mezkur kishiler hökümetning salahiyetlirini asasiy qanunda körsitilmigen shekilde zorluq bilen tartiwélishqa teyyarliq qiliwatqaniken.

tekshürüsh jeryanida yanliridin alaqe üsküniliri, alaqe tosush üsküniliri, qoral we oq - dora tépilghan mezkur kishiler dölet bixeterlik idarisi we tekshürüsh idarisi xadimliri teripidin tutup kétilgen.

yene bir tereptin, erméniye metbuatliridiki xewerlerge qarighanda, bu kishilerning birining eriwanning sabiq sheher bashliqi, «pidaiy qoghdighuchilar birleshmisi» teshkilatining sabiq muawin reisi albért bazéyan bolup, u bash ministir nikol pashinyanni qestlep öltürüshni pilanlash bilen eyiblenmekte iken.

xewerlerde, nazaret astigha élinghan mezkur kishilerning tekshürülüwatqanliqi qeyt qilindi.