liwiyediki kelkün apitide 3958 kishi qaza qildi
birleshken döletler teshkilati liwiyediki kelkün apitide 3 ming 958 kishining hayatidin ayrilghanliqini bildürdi.
türkiye awazi radiyosi xewiri: birleshken döletler teshkilati insanperwerlik ishlirini maslashturush ishxanisi liwiyediki kelkün apiti heqqide élan qilghan doklatida, kelkün apitide 3 ming 958 kishining hayatidin ayrilghanliqini uqturdi.
birleshken döletler teshkilati insanperwerlik ishlirini maslashturush ishxanisi 16-séntebir küni bu heqte élan qilghan doklatida, liwiyediki kelkün apitide 11 ming 300 kishining qaza qilghanliqini bildürgenidi.
birleshken döletler teshkilati insanperwerlik ishlirini maslashturush ishxanisining dunya sehiye teshkilatini menbe körsitip élan qilghan sanliq melumatlirigha asaslanghanda, liwiyening sherqiy qismidiki kelkün apitide 3 ming 958 kishi hayatidin ayrilghan, 9 mingdin artuq kishi yoqap ketken.
b d t xelqara köchmenler teshkilati (IOM) ning sanliq melumatlirigha qarighanda, liwiyening sherqiy shimalida 40 mingdin artuq adem öy-makanliridin ayrilip qalghan.
kelkün apitide éghir talapetke uchrighan derne shehiri qatarliq jaylarda ziyaret qilish cheklimisi sewebidin sanliq melumatlarni toplash qiyin bolghanliqtin, öy – makanliridin ayrilip qalghanlar sanining téximu köp bolush éhtimalliqi yuqiri iken.
derne shehiride kem dégende 30 ming kishi öy-makanliridin ayrilip qalghan.
birleshken döletler teshkilati balilar fondi (UNICEF) ning bildürüshiche, liwiyediki kelkün apitining tesirige uchrighan texminen 300 ming bala ich sürüsh, xoléra we ozuqluq yétishmeslik xewipige, shundaqla zorawanliq we xorlinish xewipige duch kelmekte iken.
kelkün apitidin kéyin, birleshken döletler teshkilati merkiziy jiddiy qutquzush fondidin liwiyege 10 milyon dollar meblegh ajratqan, shundaqla xelqara jemiyetni liwiyege 71 milyon 400 ming dollarliq «jiddiy qutquzush» yardimi bérishke chaqirghan.
igilinishche, liwiyede 884 ming adem yardemge, bulardin 250 ming kishi jiddiy yardemge éhtiyajliq iken.
