liwiyening sherqidiki kelkünde derne shehiridila qaza qilghanlarning sani 5300 ge yetti

türkiye awazi radiyosi xewiri:liwiyening sherqidiki awam palatasi teripidin teyinlengen ichki ishlar ministirliqi bayanatchisi tariq elxarraz 10 – sintebirde döletning sherqige éghir tesir körsetken kelkün apitide, peqet derne shehiridila qaza qilghanlar sanining 5 ming 300 ge yetkenlikini éytti.

tariq elxarraz kelkünde hayatidin ayrilghan we kimliki éniqlanghan 1300 kishining jesitining depne qilinghanliqini, kelkünde bezi aililer pütünley yoqap ketken bolghachqa kimliki éniqlanmighan nurghun jesetning barliqini we ularni hazirche depne qilishqa bolmaydighanliqini bildürdi.

tariq elxarraz dernediki kelkün apiti sewebidin qaza qilghanlar sanining 10 mingdin éship kétishi mumkinlikini tekitlep, «hazirghiche tépilmighan nurghun jesetler bar, türkiye, ereb birleshme xelipiliki  we misirdin kelgen qutquzush mutexessisler etretliri kelkün sewebidin déngizgha chüshüp ketken jesetlerni qutquzush üchün tirishmaqta» dédi.

ottura aq déngizgha tesir körsetken we 10-séntebir liwiyening sherqini weyran qilghan «daniyal» borini binghazi, beyda, merj, suse we derne sheherliride kelkün apiti peyda qilghan idi.

milliy ittipaqliq hökümitining bash ministiri abdulhemid dibeybe kelkün apiti sewebidin tünügün memliket miqyasida 3 künlük matem élan qilghan bolup, liwiye pirézidént kéngishimu qérindash döletler we xelqaraliq organlardin kelkün apitining ziyinigha uchrighan rayonlar üchün yardem telep qilghan idi.

qizil krést jemiyiti liwiyediki kelkün apitide yoqap ketkenler sanining 10 minggha yetkenlikini élan qilghan idi.

liwiyening sherqiy rayonliridiki höl-yéghin miqdarining «40 yildin buyanqi eng yuqiri» sewiyege chiqqanliqi bildürülgen idi.