marakeshtiki yer tewreshte qaza qilghanlarning sani 2 ming 122 ge yetti
marakesh ichki ishlar ministirliqi 8- séntebir shu yer waqti 23:10 de yüz bergen yer tewreshke alaqidar eng yéngi uchurlarni hembehrilidi.
türkiye awazi radyosi xewiri: ministirliqning bayanatida, marakeshning elxuz rayonini merkez qilghan 7 bal yer tewreshte qaza qilghanlar sanining 2 ming 122 ge we yarilanghanlar sanining 2 ming 421 ge yetkenliki bildürüldi.
izdesh we qutquzush xizmetliri üchün rayongha herbiy aptomobillar we qurulush aptomobillirini yollash dawamlashmaqta.
yene bir tereptin, italiye muawin bash ministiri we tashqi ishlar ministiri antoniyo tajani marakeshke jiddiy yardem teklipi sunghanliqini bildürdi.
aljiriyemu marakeshke yer tewreshning tesirige taqabil turush üchün jiddiy yardem bérishni teklip qildi.
marakesh bolsa, ispaniye, engliye, qatar we ereb birleshme xelipilikining yardem tekliplirini qobul qilghanliqini élan qildi.
marakesh ichki ishlar ministirliqining yazma bayanatida, mezkur döletlerning «izdesh-qutquzush etriti ewetish» yardem tekliplirining qobul qilinghanliqi uqturuldi.
izdesh we qutquzush etretlirining marakesh etretliri bilen maslashqan halda xizmet qilish üchün yekshenbe küni marakeshke yétip kelgenliki bildürüldi.
bayanatta yene, marakeshning herqaysi döletlerning hemkarliq teklipliri we teshebbusidin memnun bolghanliqi élan qilindi.
