putin pirigojin üchün teziye bayanati élan qildi

türkiye awazi radiyosi xewiri: putin krémil sariyida atalmish ​​donétsik xelq jumhuriyitining waqitliq pirézidénti dénis pushilin bilen körüshti.

uchrishishta, putin aldinqi küni twér rayonida chüshüp ketken ayropilanda prigojinningmu qaza qilghanliqi heqqide toxtilip mundaq dédi: «ayropilan chüshüp kétish weqeside jénidin ayrilghanlarning aile-tawabiatlirigha teziye bildürimen. ayropilan chüshüp kétish weqeliri her daim tolimu échinishliq ehwal. deslepki sanliq melumatlargha qarighanda, chüshüp ketken ayropilanda wagnér xadimlirimu bar iken.»

u wagnérning ukrainadiki «yéngi natsistlar hakimiyiti» ge qarshi küreshke muhim töhpilerni qoshqanliqini bayan qilip mundaq dédi: «biz buni bilimiz we xatirilep turimiz, hergizmu untup qalmaymiz.»

putin prigojinni 90-yillarning bashliridin tartip tonuydighanliqini tekitlep mundaq dédi: «prigojin teqdiri murekkep, emma talantliq adem idi, uning hayatida éghir xataliqlar bar idi.»

pirézidént putin prigojinning rusiyedin sirt yene, dunyaning herqaysi rayonliridimu «muweppeqiyetlik netijilerni» qolgha keltürgenlikini bayan qilip mundaq dédi: «u talantliq karxanichi idi, u élimizdila emes, chet ellerde, bolupmu afriqada xizmet qildi. u néfit, tebiiy gaz, qimmetlik métal – tashlar sodisi bilen shughullandi.»

u yene, twér rayonida chüshüp ketken ayropilangha munasiwetlik zörür tekshürüshlerning élip bérilidighanliqinimu sözlirige ilawe qildi.