zéléniskiy: rusiye zaporizhyagha her küni hujum qiliwatidu
ukraina pirézidénti wiladimir zélénskiy rusiyening zaporizhya shehirige qilghan eng yéngi hujumida bir kishining qaza qilghanliqini bildürdi.
türkiye awazi radiyosi xewiri: zélénskiy özining télégramma qanilidiki adrésida uchur hembehrilep, rusiyening ukrainaning zaporizhya shehirige her küni hujum qiliwatqanliqini, rusiye armiyesining tünügün (10-awghust peyshenbe)mu zaporizhyagha hujum qilghanliqini bildürdi.
zélénskiy uchurida: «hujum netijiside, puqralar olturuwatqan bir binada ot apiti yüz berdi. bir adem hayatidin ayrildi. yene yarilanghanlarmu bar. munasiwetlik mulazimet xadimliri neq meydandiki zörür xizmetlerni dawamlashturup, kishilerni qutuldurmaqta. tajawuzchilarni yoqitiwatqan her bir eskirimiz ukraina üchün adalet we öch élishni yéqinlashturidu. ukraina put tirep turidu. rus térrori meghlubiyiti muqerrer» dégen ibarilerge orun berdi.
ukraina ichki ishlar ministiri igor kliménkomu hujumda bir ayalning qaza qilghanliqini, birining ehwali éghir bolup jemiy toqquz kishining yarilanghanliqini uqturdi.
ukraina seyshenbe küni rusiyening zaporizhya shehirige hujum qilghanliqini, hujumda üch kishining qaza qilghanliqini, toqquz kishining yarilanghanliqini élan qilghanidi.
