gherbiy afriqa döletliri iqtisadiy birleshmisi nigérgha esker ewetidu

türkiye awazi radiyosi xewiri: nigériyening paytexti abujada nigérdiki herbiy özgirish küntertipi bilen échilghan gherbiy afriqa döletliri iqtisadiy birleshmisi bashliqlar yighini axirlashti.

yighinida chiqirilghan qarargha asasen, gherbiy afriqa döletliri iqtisadiy birleshmisige eza döletlerning mudapie ministirlirigha, nigérda «asasiy qanun tertipi ornitish» üchün «éhtiyat qisimliri» ni teyyar haletke ötküzüp, négirgha orunlashturush permani chüshürüldi.

«éhtiyat qisimliri» ning qeyerge orunlashturulidighanliqi toghrisida melumat bérilmidi.

gherbiy afriqa döletliri iqtisadiy birleshmisige eza döletler bayanatida, esker orunlashturushqa teyyarliq qilishni qarar qilghan bolsimu, emma mesilini söhbet arqiliq hel qilishni xalaydighanliqlirinimu eskertti.

bashliqlar yighinigha riyasetchilik qilghan gherbiy afriqa döletliri iqtisadiy birleshmisining nöwetchi reisi bola tinubu: «mesilini hel qilish qarishimizning asasini diplomatik muzakireler we diyalog teshkil qilidu. bu yollar téxi tügimidi. muzakire yoli hazirmu ochuq, herbiy küch ishlitish eng axirqi chare»dédi.

gherbiy afriqa döletliri iqtisadiy birleshmisi bashliqlar yighinining axiridimu, muzakire we herbiy arilishish yollirining barliqi bildürülgen halda kirizisni tinchliq bilen hel qilish üchün barliq tirishchanliqlarning körsitilidighanliqi eskertildi.

gherbiy afriqa döletliri iqtisadiy birleshmisi éhtiyat qisimlirini 2003-yili pil chishi sahili we libériyege, 2012-yili gine bisawgha we 2013-yili maligha muqimliqni saqlash üchün kirgüzgen idi. gherbiy afriqa döletliri iqtisadiy birleshmisining éhtiyat qisimliri, eza döletler kirizis rayonigha ewetken eskerlerdin teshkil tapidu. éhtiyat qisimlirini melum döletke ewetish üchün eza döletler ortaq qarar chiqirishi yaki afriqa ittipaqi wezipige chaqirishi kérek.

gherbiy afriqa döletliri iqtisadiy birleshmisi texminen 2750 eskerdin terkib tapqan «wezipe ötesh qismi» we 3750 eskerdin terkib tapqan «asasliq qism» ni eza döletlerdin yighidu. herbiy we saqchilardin tüzülgen éhtiyat qismining mali, nigériye we ganada telim-terbiye merkezliri bar.