polsha bélarusiye chégrasigha zapas esker orunlashturush toghrisidiki telipini testiqlidi
polsha dölet mudapie ministirliqi chégra mudapie qomandanliqining telipige binaen bélarusiye chégrasigha qoshumche esker ewetishni testiqlidi.
türkiye awazi radiyosi xewiri: polsha xewer agéntliqi —PAP, polsha mudapie ministirliqining bayanat élan qilip: «dölet mudapie ministiri mariyus bilaszak chégra muhapizetchilirining téximu köp esker ewetish toghrisidiki telipini qobul qildi. polsha- bélarusiye chégrasidiki heriketchan weziyet we kelgen telepke asasen, ministir bilazzak rayongha qoshumche esker orunlashturush toghrisida buyruq chüshürdi» dégenlikini xewer qildi.
polsha chégra mudapie qisimliri mushu heptining béshida bélarusiye chégrasigha qoshumche 1000 esker ewetilishini telep qilghanidi.
warshawa hökümiti buningdin burun bélarusiye chégrasigha éléktironluq réshatka ornatqanidi.
wagnér yallanma eskerler guruppisi ezaliri yéqinqi bir nechche hepte ichide polsha chégrasigha yéqin jayda otturigha chiqqan, bash ministir matéus morawiyékki bu özgirishning shimaliy atlantik ehdi teshkilati — natoning sherqiy qirghiqidiki weziyetni muqimsizlashturushni nishan qilidighanliqini éytqanidi.
polsha taratqulirining xewirige qarighanda, döletning bélarusiye bilen chégradash jaylirida 2000 esker, yüzlerche saqchi we chégra qoghdighuchi wezipe ötimekte iken.
