amérika rusiyening shimaliy koréyedin téximu köp qoral - yaragh telep qilghanliqini ilgiri sürdi

türkiye awazi radiyosi xewiri: aqsaray dölet bixeterlik kéngishining istratégiyelik alaqe maslashturghuchisi jon kirbi, rusiye dölet mudapie ministiri sérgéy shoyguning 26- iyuldiki shimaliy koréye ziyariti jeryanida shimaliy koréyelik emeldarlar bilen söhbetliship, pyongyangdin döliti 2022- yili 24 – féwraldin buyan dawamlishiwatqan rusiye – ukraina urushida éhtiyajliq boluwatqan oq- dora bilen teminlesh miqdarini köpeytishni telep qilghanliqini ilgiri sürdi.

shoyguning ilgiri sürülgen uchrishishigha «putinning urush mashinisi jaza we éksport kontrolluqining qanchilik éghir tesirige uchrighanliqining bir misali» dep baha bergen kirbi, rusiyening ukrainani boysundurush üchün, iran, shimaliy koréye we xitayning qollishigha érishmekchi boluwatqanliqini otturigha qoydi.

rusiye dölet mudapie ministiri sérgéy shoygu we uning hemrahliqidki wekiller ömiki 26- iyul shimaliy koréyege bérip, koréye urushigha xatime bergen panmonjom urush toxtitish kélishimining 70 yilliqini tebriklesh paaliyitige qatnashqanidi.

amérika tashqi ishlar ministiri antoni blinkén 29- iyul bayanat bérip, shoyguning shimaliy koréyege qoral- yaragh sétiwélish üchün barghan bolush mumkinlikini ilgiri sürgenidi.