nigérdiki herbiy hökümet gherbiy afriqa iqtisadiy birleshmisige naraziliq bildürdi
nigérda hakimiyetni tartiwalghan herbiy hökümet (wetenni qoghdash milliy kéngishi) (CNSP) ning rehbiri abdurrahman ömer tchiyani gherbiy afriqa iqtisadiy birleshmisige naraziliq bildürdi.
türkiye awazi radiyosi xewiri: nigérda hakimiyetni tartiwalghan herbiy hökümetning rehbiri abdurrahman ömer tchiyani 3-awghust (2023) musteqilliq küni munasiwiti bilen dölet téléwiziyeside bayanat élan qildi.
u gherbiy afriqa iqtisadiy birleshmisi (ECOWAS) ning nigérgha qaratqan jazasining «qanunsiz, adaletsiz we insaniyliqqa xilap» ikenlikini bildürüp, bu jazalarning nigér xelqini téximu namratlashturidighanliqini eskertti.
u firansiyeliklerning chégradin chiqip kétishi toghrisida toxtilip: «firansiye puqralirining nigérdin chiqip kétishide konkrét seweb yoq, eslide ular üchün azraqmu tehdit yoq» dédi.
u firansiyening herbiy hemkarliqni waqtinche toxtitishini tenqid qilip: «térrorluqqa qarshi turushqa yardem bergenlikini dewatqanlar azraqla qiyinchiliqta herbiy hemkarliqlarni toxtitidu» dédi.
gherbiy afriqa iqtisadiy birleshmisi 30-iyul (2023) pewquladde yighin chaqirip, nigérdiki herbiy hökümetke, pirézidént muhemmed bazumni qoyup bérishi we uning wezipisige qaytip kélishi üchün bir hepte waqit bergen idi.
gherbiy afriqa iqtisadiy birleshmisi bu waqit ichide telepliri orunlanmighan ehwalda herbiy arilishishni öz ichige alghan barliq tallashlarni közdin kechüridighanliqini uqturghan idi.
herbiy arilishish éhtimali, gherbiy afriqadiki bashqa herbiy hökümetlerning diqqitini qozghighan idi.
hökümetliri eskerlerdin teshkil tapqan burkina faso we mali ortaq xitabname élan qilip, nigérgha herbiy jehettin arilishishning özliri üchün urush élan qilish bolidighanliqi toghrisida gherbiy afriqa iqtisadiy birleshmisini agahlandurghan idi.
bir tereptin, nigériye nigérdiki herbiy hökümetke qarshi bezi tedbirlerni yolgha qoydi. bu ramkida, nigériye shimaldiki qoshnisi nigérni éléktr bilen teminleshni toxtatti.
nigér éléktrining %70 ni nigériyedin qamdaydu.
nigér pirézidénti muhemmed bazum 26-iyul pirézidéntliq mehkimisining muhapizet bataliyoni teripidin tutuldi. shu küni axshimi armiye herbiy özgirish qozghap hakimiyetni tartiwaldi.
pirézidéntliq mehkimisi muhapizet bataliyonining qomandani général abdurrahmané omar tachiyani 28-iyul (2023) «wetenni qoghdash milliy kéngishi» namliq herbiy guruh we waqitliq hökümetning bashliqi bolghanliqini élan qilghan idi.
pirézidént muhemmed bazum 26-iyuldin tartip shexsiy turalghusida nazaret astida turmaqta.
