ispaniye türkiyening yawropa ittipaqigha eza bolushini qollaydighanliqini bildürdi.
ispaniye bash weziri pédro sanchéz türkiyening yawropa ittipaqigha eza bolush musapisini qollaydighanliqi toghrisida wede berdi.
türkiye awazi radiyosi xewiri: litwaniyening paytexti wilnyusta chaqirilghan shimaliy atlantik ehdi teshkilati bashliqlar yighinida dölitimiz (türkiye jumhuriyiti) jumhur reisi rejep tayyip erdoghan bilen körüshken ispaniye bash weziri pédro sanchéz, muxbirlarni kütüwélish yighinida bu heqte toxtaldi.
yawropa ittipaqining nöwetchi reislik wezipisini bu yilning axirighiche dawamlashturidighan ispaniyening bash weziri sanchéz bu mezgilde türkiyening yawropa ittipaqigha eza bolush musapisige dair mesililerni otturigha qoyush toghriliq türkiye jumhuriyiti jumhur reisi rejep tayyip erdoghangha wede bergenlikini tekitlep mundaq dédi: «türkiyeni yawropa ittipaqigha téximu yiraq emes, belki téximu yéqin hés qildurush üchün, biz bu aylarda (ispaniyening yawropa ittipaqining nöwetchi reislikiki mezgilide) qandaq qedemlerni tashlaydighanliqimizni éniq békitiwélishimiz kérek. ispaniye bolush süpitimiz bilen, türkiye bizdin qattiq telep qiliwatqan wizisiz sayahet we tamozhna ittipaqi kélishimini tengshesh mesilisige her daim ijabiy pozitsiye tutup kéliwatimiz.»
sanchéz ispaniyening yawropa ittipaqi ichide öz aldighila qarar chiqiralmaydighanliqini, emma özlirining pütün küchi bilen türkiyege munasiwetlik bu ikki mesilini yawropa ittipaqining nöwetchi reisliki hoquqi dairiside qolliridin kélishiche kün tertipige élip kélidighanliqlirini qeyt qildi.
u yene hökümetler ara bashliqlar yighini ötküzüp kéliwatqan türkiye bilen ispaniye otturisida istratégiyelik we keng dairilik hemkarliqning barliqinimu sözlirige ilawe qildi.
