médwédéw: «üchinchi dunya urushi yéqinlashmaqta»
rusiye bixeterlik kéngishining muawin reisi dimitri médwédéw shimaliy atlantik ehdi teshkilati bashliqlar yighinida élinghan ukrainagha qoral yardimini köpeytish qararigha naraziliq bildürüp, «bu ayighi yoq kocha, üchinchi dunya urushi yéqinlashmaqta» dédi.
türkiye awazi radiyosi xewiri: rusiye bixeterlik kéngishining muawin reisi médwédéw yazma bayanat élan qilip, litwaniyening paytexti wilnyusta ötküzülgen nato rehberliri yighini üstide toxtaldi.
médwédéw ukrainaning natogha qobul qilinmasliqi mumkinlikini ilgiri sürüp: «ittipaqtiki réalizmchilarning yuqiri awazda déyishtin qorqidighini eslide del mushu. buningdin bashqa yene, ukrainagha qoral-yaragh, bashqurulidighan bomba, misket bombiliri we ayropilanlar bolup, mumkin bolghan barliq yardemler her jehettin küchiyidu» dédi.
médwédéw gherbning «aljighan» liqini tekitlep, «aljighan gherb, bashqa héchnimini oyliyalmaydu. bu bir ayighi yoq kocha, üchinchi dunya urushi yéqinlashmaqta» dédi.
bu netijilerning rusiyege bolghan menisiningmu intayin éniq ikenlikini tekitligen médwédéw yene mundaq dédi:
«alahide herbiy heriket oxshash nishan bilen dawamlishidu. bulardin birsi, biz bashtin-axir tekitlep kelgen kiyéw natsistlar guruppisining natogha eza bolushining ret qilinishi we bu mumkin emes. shunga, bu guruppini yoqitishqa toghra kélidu, mana bu mumkin we zörür.»
rusiye tashqi ishlar ministirliqi bayanatchisi mariya zaxarowamu ijtimaiy alaqe torida élan qilghan bayanatida, natoning litwaniyediki bashliqlar yighinida élan qilghan bayanatida, ittipaqning rusiye bilen toqunushning koyida emeslikini bildürgenlikini ekertip: «elwette, nato rusiye bilen toqunushning koyida emes, nato peqet toqunushqa qatnashmaqta» dédi.
