хитай афғанистанниң қашқәри (қәшқәр) районида нефт чиқиришни башлиди
афғанистанда талибан билән хитайниң ширкити һәмкарлиқ орнатқандин кейин, сари-пул вилайитиниң қашқәри (қәшқәр) райониға җайлашқан нефт қудуқтин тунҗи қетим нефит чиқириш башланди.
түркийә авази радийоси хәвири: сари-пул вилайитигә қарашлиқ қашқәри (қәшқәр) районида нефт қудуқидин бивастә ишләпчиқириш башлаш мунасивити билән өткүзүлгән мурасимға талибан вақитлиқ һөкүмитиниң кан вә нефит ишлири министирлиқи вәкили шаһабәддин дилавәр билән хитай ширкитиниң әмәлдарлири қатнашти.
дилавәр сөзидә бу райондики йәнә 15 нефит қудуқиниң 2023-йилиниң ахириғичә ремонт қилинип, ишқа кириштүрүлидиғанлиқини тәкитлиди.
дилавәр чәтәллик мәбләғ салғучиларни афғанистанға тәклип қилип, кәлгүсидә бу вилайәттики нефит қудуқлиридин 100 тонна нефит чиқирилидиғанлиқини ейтти.
йәнә бир тәрәптин, талибан һөкүмити афғанистанниң шималидики мазар шәриф билән шибирган шәһәрлири оттурисида 95 киломитирлиқ тәбиий газ туруба линийәси қурулушиниң башланғанлиқини елан қилди.
талибан вақитлиқ һөкүмити билән хитай ширкити (CAPEIC) оттурисида 5-йанварда афғанистанниң шималидики аму дәрйаси әтрапида нефит чарлаш вә қедириш келишими имзаланған иди.
келишимгә асасән, җузҗан, фарийаб вә сар-пул қатарлиқ вилайәтләрдә омумий көлими 4500 квадрат километир келидиған җайда нефт издәш хизмити елип берилмақта.
хитай ширкитиниң дәсләпки йили 150 милйон доллар, дәсләпки 3 йилда болса, җәмий 540 милйон доллар мәбләғ селиши үмит қилинмақта.
тохтам муддитиниң 25 йил икәнлики әмма хитай ширкити 1 йил ичидә мәҗбурийәтлирини ада қилмиған тәқдирдә, тохтамниң аптоматик бикар қилинидиғанлиқи билдүрүлгән иди.
талибанниң бу ләйиһәдин дәсләптә %20 үлүшкә еришидиғанлиқи вә буниң вақитниң өтүшигә әгишип %75 кичә чиқирилидиғанлиқи һәмдә бу лайиһә билән 3 миң афғанистанлиқниң ишқа орунлишиш пурситигә сазавәр болидиғанлиқи уқтурулған иди.
