yawropa kishilik hoquq mehkimisi firansiyening qanunlargha xilapliq qilghanliqigha höküm qildi
yawropa kishilik hoquq sot mehkimisi firansiyening türmilerge heddidin ziyade mehbus qamash arqiliq qanungha xilapliq qilghanliqigha höküm qildi.
türkiye awazi radiyosi xewiri: yawropa kishilik hoquq sot mehkimisi teripidin élan qilinghan hökümnamige asaslanghanda, parizhning jenubidiki frésnés türmiside yatqan üch sabiq mehbus, 2016- 2019- yilliri qamalghan mezkur türmidiki qistangchiliqni pakit körsitip, firansiye üstidin sotqa erz sunup ghelibe qilghan.
sot mehkimisi ikki firansiyelik bolup jemiy üch mehbusning 2019- yili tolup kétish nisbiti %197 ge yetken türmide tutup turulushining yawropa kishilik hoquq ehdinamisining 3- we 13- maddilirigha xilap ikenlikige höküm qildi.
mezkur maddilarning birinchisi, «héchkimge insan qélipidin chiqqan xorlighuchi muamile qilishqa bolmaydighanliqi»ni, ikkinchisi bolsa, «heq – hoquq we erkinliki — hetta hökümet organliri teripidin bolsimu — dexli- teruzgha uchrighan her bir shexsning uni qoghdaydighan edliye orunlirigha iltimas qilish hoquqining barliqi»ni mezmun qilidu.
2020 – yilimu mushuninggha oxshash bir déloda firansiyening qanungha xilapliq qilghanliqigha höküm qilghan yawropa kishilik hoquq sot mehkimisi, bu délodimu bashqiche yekün chiqirishqa bolidighan héchqandaq seweb yoqluqini otturigha qoyup, firansiye dölitini erz sunghan mezkur üch kishige 46 ming yawro jerimane töleshke höküm qildi.
sot mehkimisi yene, mezkur mehbuslarning dölet ichidiki qanun organlirigha murajiet qilish yolliri tügimey turup, yawropa kishilik hoquq sot mehkimisige erz sunushining pirinsipqa xilap ikenlikini eskertti.
firansiye metbuatlirining edliye ministirliqining sanliq melumatlirigha asaslanghan uchurlirigha qarighanda, firansiye türmiliridiki qistangchiliq nisbiti %120 ke örligen bolup, normidin éship ketken 15 ming mehbus bar iken.
