stolténbérg jumhur reis erdoghan we shiwéytsiye bash ministir bilen körüshidu
shimaliy atlantik ehdi teshkilati bash katipi jéns stolténbérg jumhur reis rejep tayyip erdoghan we shiwéytsiye bash ministiri ulf kiristérson bilen körüshidu.
türkiye awazi radiyosi xewiri: shimaliy atlantik ehdi teshkilati bash katipi jéns stolténbérg litwaniyening paytexti wilnyusta chaqirilidighan shimaliy atlantik ehdi teshkilati bashliqlar yighini harpisida dölitimiz (türkiye jumhuriyiti) jumhur reisi rejep tayyip erdoghan we shiwéytsiye bash ministiri ulf kiristérson bilen körüshidighanliqini bildürdi.
bash katip stolténbérg tünügün bélgiyening paytexti biryusséldiki shimaliy atlantik ehdi teshkilatining merkizide ötküzülgen 5-nöwetlik türkiye-finlandiye-shiwéytsiye daimiy birleshme méxanizm yighinidin kéyin bayanat élan qildi.
stolténbérg 11-iyul küni litwaniyening paytexti wilnyusta bashlinidighan ikki künlük shimaliy atlantik ehdi teshkilati bashliqlar yighini harpisida, türkiye bilen shiwéytsiye otturisida aliy derijilik rehberler uchrishishining ishqa ashurulidighanliqini tekitlep mundaq dédi: «düshenbe küni, litwaniyening paytexti wilnyusta jumhur reis rejep tayyip erdoghan we shiwéytsiye bash ministiri ulf kiristérson bilen körüshimen.»
u türkiyening qanunluq bixeterlik endishisining barliqini, shimaliy atlantik ehdi teshkilatidiki héchqandaq bir ittipaqdash döletning türkiyege oxshash térrorizmning ziyinigha uchrimighanliqini qayta tekitlep mundaq dédi: «p k k bir térrorluq teshkilatidur. derweqe, p k k shimaliy atlantik ehdi teshkilatining nurghun ittipaqdash döletliride teshkillik jinayetlerni élip bardi. biz bügün shiwéytsiyediki sot mehkimiside chiqirilghan qarargha oxshash téximu yéqindin hemkarliship, muhim qararlarni chiqaralishimiz mumkin. bu hem térrorizmgha qarshi küresh jehettin hemde teshkillik jinayetlerge qarshi küresh jehettin yaxshidur. bu shimaliy atlantik ehdi teshkilatidiki ittipaqdash döletlerning türkiyening qanunluq bixeterlik endishilirige estayidil muamile qilidighanliqidin dérek béridu, elwette.»
stolténbérg sözide yene shiwéytsiyening muhim qedemlerni tashlighanliqini, ötken yili madridta imzalanghan üch tereplik kélishim layihesige asasen mejburiyitini ada qilghanliqini ilgiri sürdi.
shiwéytsiyening qoral - yaragh éksporti cheklimilirini bikar qilip, térrorizmgha qarshi küresh mesiliside qanungha özgertish kirgüzgenlikini, axbarat jehettin hemkarlashqanliqini bayan qilghan stolténbérg shiwéytsiye bilen türkiye dölet bixeterlik organlirining téximu chongqur hemkarliq ornitalaydighanliqini we buning dawamlishidighanliqigha ishinidighanliqini qeyt qildi.
stolténbérg hem tünügünki uchrishish hem düshenbe küni litwaniyening paytexti wilnyusta erdoghan we kiristérson bilen ishqa ashuridighan uchrishishning ixtilapni hel qilishni meqset qilidighanliqini tekitlep mundaq dédi: «shimaliy atlantik ehdi teshkilatida hemishe dawamlashturup kéliwatqinimizdek, ixtilaplarni tügitishning birdinbir yoli kéngishish hem meslihetlishishtur. yighinda yaxshi ilgirileshlerni qolgha keltürduq. kéler hepte shimaliy atlantik ehdi teshkilati bashliqlar yighinida aktip qarar chiqirish mumkin, hemmimiz shiwéytsiyening shimaliy atlantik ehdi teshkilatigha eza bolush iltimasining imkanqeder téz testiqlinishi mesiliside birdeklik hasil qilduq.»
مۇناسىۋەتلىك خەۋەرلەر
