dunya musulman ölimalar birleshmisi xatiblarni quran kerimge qilinghan hujumlarni eyibleshke chaqirdi

türkiye awazi radiyosi xewiri: dunya musulman ölimalar birleshmisi dunyaning her qaysi jayliridiki imam - xatiblarni bu heptilik jüme xutbiliride shiwétsiyening paytexti stokholmdiki bir jamening aldida sadir qilinghan quran kerimni köydürüsh qilmishini eybleshke we mesjidi eqsa qatarliq pelestindiki muqeddes jaylarni qoghdash mesililirini otturigha qoyushqa chaqirdi.

dunya musulman ölimalar birleshmisining stokholmdiki quran kerimni köydürüshtek qebih qilmish eslitip ötülgen yazma bayanatida: «öchmenlikke tolghan, qutritish xaraktérlik bu jinayi qilmish barliq qimmet qarashlargha, exlaqqa we diniy jehettiki muqeddes amillargha hörmet qilish we ulargha keng qorsaqliq bilen muamile qilish pirinsipigha xilap» dégen ibarilerge orun bérildi.

shuning bilen bir waqitta, «tajawuzchilar»ningmu pelestindiki bezi meschitlerde quran kerimni yirtiwetkenliki we musulmanlarning tunji qiblisige bihörmetlik qilghanliqigha isharet qilinghan bayanatta, buningdin ilgirimu haqaret xaraktérlik hejwiy resimlerning élan qilinghanliqi, emma hökümet we xelqlerning buninggha küchlük naraziliq bildürmigenliki qeyt qilinghandin kéyin: «biz barliq musulman ölimalarni 7- iyulgha toghra kélidighan jüme xutbiside shiwétsiyediki quran kerimni köydürüsh qilmishini eyibleshke hemde mesjidi eqsa we pelestindiki muqeddes jaylirimizni qoghdash heqqide sözleshke chaqirimiz» déyildi.

bayanatta yene, musulman döletler bu xil jinayetni sadir qilghanlargha qarshi diplomatik we iqtisadiy bayqut élan qilish qatarliq emeliy tedbirlerni qollinishqa chaqirildi.

musulman döletlirining hökümetliri kishilik hoquq teshkilatliri bilen hemkarliship, dinni haqaretleshni jinayet hésablaydighan bir qanun maqullashqa chaqirilghan bayanatta, ikkinchi qedemde, mezkur qanunni dingha hujum qilishning xelqaraning tinchliq we bixeterlikige xilapliqini nezerde tutup, birleshken döletler teshkilatigha tapshurush kérekliki otturigha qoyuldi.

bayanatta yene, musulman az sanliqlarghimu bu mesilige qarshi «tinchliq» namayishlirini ötküzüshni we edliye organlirigha erz sunushni tewsiye qildi.