gutérrés israiliyeni pelestin zéminlirigha olturaq rayoni qurush pilanidin waz kéchishke chaqirdi

türkiye awazi radiyosi xewiri: b d t bayanat ishliri ishxanisi bu heqte yazma bayanat élan qilip, gutérrésning israiliyening ishghaliyet astidiki gherbiy qirghaq (iyordan deryasining gherbiy qirghiqi) qa 4000 din artuq yéngi olturaqlishish rayoni tesis qilish pilanidin «qattiq endishe we biaramliq hés qiliwatqanliqi» ni otturigha qoydi we bu pilanning israiliyening olturaqlishish rayonlirini tesis qilish paaliyetlirining süritini tézlitidighanliqini bildürdi.

bayanatta körsitilishiche, olturaqlishish rayoni pilanlirining xelqara qanungha ochuq - ashkara xilap ikenlikini tekitligen gutérrés, bu xil pilanlarning ikki döletlik adil we sijil tinchliq ornitish üchünmu tosalghu peyda qilidighanliqini eskertken.

u qanunsiz olturaq rayonlarni kéngeytishning jiddiychilik we zorawanliqni keltürüp chiqiriwatqanliqini, shuning bilen bir waqitta, israiliyening ishghaliyitini mustehkemlep, pelestin xelqining tebiiy bayliqlirining tartiwéliwatqanliqini tekitligen.

eskertilishiche, bash katip gutérrés «israiliye» hökümitini ishghal qiliwélinghan pelestin zéminliridiki barliq olturaqlishish rayoni tesis qilish paaliyetlirini derhal toxtitip, munasiwetlik qararlirini qayturuwélishqa chaqirghan we uningdin qanuniy mejburiyetlirini ada qilishini telep qilghan.

ishghaliyet astidiki pelestin zéminlirida qanunsiz olturaq rayonlirini tesis qilishni dawamlashturuwatqan israiliye hökümiti, nöwette yene zor kölemlik yéngi bir yehudiy olturaq rayoni qurushni pilanlimaqta.

pelestinlikler bilen «tinchliq derhal (ornitilsun)» herikitige oxshash, israiliyediki solchil éqim teshkilatlarmu bu pilangha qarshi chiqmaqta.

pelestin hökümiti bilen yawropa ittipaqimu israiliyening bu herikitining pelestin – israiliye mesilsiini ikki döletlik hel qilish pursitidin mehrum qilip qoyidighanliqini tekitlimekte.